《辣警霸王花》香香蔡潔落水全女打 崔碧珈浮台被踩胸

下周四 (13/10) 正式在港、澳兩地同步上映、由錢國偉執導、黃永峰及黃柏高聯合監製的動作電影《辣警霸王花》，故事延續 80 年代霸王花經典，一眾新霸王花在片中由頭打到尾，其中一幕在馬來西亞取景拍攝的泳池浮台女子搏擊，講述岑麗香、何佩瑜 (Jeana)、鄭欣宜、崔碧珈 (Anita)、何佩珉及蔡潔 (Jacky) 等兩組學員着上bra top和短褲隻揪又群揪，畫面吸晴之餘亦動作悅目。

今次 Anita 扮演一名有情有義但又烏龍騰雞的霸王花，當日她拍攝浮台打鬥戲，被其他女學員圍毆，咁就慘啦，「拍呢場戲差唔多所有演員都出晒嚟打，但因為浮台郁嚟郁去，會有一定難度，我哋拍踢腿、烏低嘅動作，好多時都NG，好容易唔小心跌低，係一路打一路跌落水，落到水仲要繼續打。」碌低兼變落湯雞都其次，最慘係Anita 被兩名霸王花夾攻踩她胸部，拍時真係滴晒汗，她說：「我覺得蝦碌架，嗰兩個扮反派嘅女仔踩住我上半身，一人一腳，但其實佢哋需要平衡，我哋係手捉住手拍呢場戲，不過今次成個過程拍得好開心，少少辛苦一定有，我哋睇咗部電影嘅效果，希望大家都喜歡啦。」

浮台上另一場戲肉係香香大戰 Jacky，兩個靚女互撻生魚，由浮台打到入水底，夠晒巴辣，Jacky說：「我同香香對打，係有好彩亦有唔好彩。好彩係香香係個非常sweet 嘅女仔，同佢相處係好開心，大家夾打鬥夾做戲都比較有默契，同佢做對手戲好舒服；唔好彩嘅係佢太過嬌滴滴，佢嘅手手腳腳好幼，我就好驚，死啦，對比香香我都好大隻吓，好驚整到佢；同埋我哋要由浮床打到落水，我哋兩個都濁親幾次，另外有個水底鏡頭都好講求默契，我哋又要閉氣又要喺水底扭嚟扭去，難度都高，但出嚟效果就好滿意。」