雖然有左另一半，自己做嘅每一樣野都要開始以兩個人為出發點，但其實喺顧及身邊女友感受嘅時候，大家都總會想有番少少個人空間處理一下私人野。例如同一大班兄弟出去玩怕佢悶，於是就無叫佢，但有啲女仔卻會因為咁而埋怨你唔理佢，仲會話你唔比佢跟埋嚟而嬲左你。
咁究竟對於男士嚟講，另一半點樣嘅癡身行為係會令佢地特別怕嘅呢？
1. 無事獻殷勤以換取你嘅個人時間
捨棄佢自己嘅時間24小時監視住你係其中一個方法，但另一個更加常見嘅小動作就係佢地會經常無事獻殷勤，而希望會令你產生內疚感，覺得自己需要花多少少時間陪佢。例如一個鐘裡面send幾10個短訊關心你、成日送禮物比你，又或者幫你安排晒周末活動咁，其實都真係令人幾透不過氣來。
2. 乜都遷就晒你，務求可以跟實你
為左能夠24小時跟實你，有啲女仔就算本身自己約左人，都會出盡招數推晒自己嘅活動，目的就係能夠隨傳隨到，留意住你一嘅一舉一動。更甚嘅就係除左會改自己schedule去迎合你之外，佢地更加會不斷以短訊跟蹤你每日嘅活動，等你要將自己嘅時間一一奉獻比佢，一定要同佢出雙入對先得。
3. 短訊轟炸，唔覆即面黑
因為缺乏自信，有部分女仔就會覺得自己需要無時無刻都出現喺另一半腦海當中，所以就會不斷以短訊轟炸對方，希望得到你地嘅認同同埋接納。但如果你突然有野做一時覆唔到佢，佢就會覺得你忽視左佢，又或者係唔再愛佢。
4. 想盡辦法套你料
因為覺得您滿足唔到佢感情上嘅需要，有部分人嘅另一半就會不斷想盡辦法套男方嘅料，而除左你嘅動向之外，佢仲會好想知道你有咩性癖好，想喺看清你諗法之後搵空位入侵你個心，總之就係想箍實你。
5. 就算係你錯佢都攬埋上身
為左留住你個人，有時就算明明真係自己錯，佢都會無端端將罪名攬上身。除左有機會係想你哄番佢之外，更甚嘅可能係佢想不顧一切想同佢喺埋一齊，唔想同你分開。
6. 無視你任何嘅私隱
突然有事行開將無上鎖嘅電話放左喺度，但轉個頭番到嚟，竟然就見到佢無問過就係咁碌你個電話？如果你喺呢個時候質問佢，佢就會理所當然咁話男女朋友間應該全無秘密，所以就覺得睇你電話都無任何問題，唔覺得係侵犯左你私隱。
7. 分開左仲死纏爛打
雖然已經表明同佢分手，但佢依然死纏爛打，依舊傳嚟情慾短訊或者製造機會想你同佢喺番埋一齊。其實如果真係決定分開左，咁做只係會令人覺得非常煩厭，而且更會令人覺得佢唔識得放手非常纏擾。
