黐手並非詠春嘅全部

眾所周知，黐手是詠春最具代表性嘅練習方法，透過黐手嘅練習，學習者能夠高度集中聽勁嘅訓練，亦即係靠觸覺，感受對方力量流向，並因應對手所施予嘅力量作相應嘅引導及利用，以達至卸力或借力打力之效。好多詠春門人沉醉於黐手練習，皆因憑藉觸覺便能洞悉對手嘅攻擊意圖，從而後發先至。因為我地都相信，技撃必然會有接觸，而詠春嘅黐手就是始於接觸，當接觸到對方之後，就是我地詠春嘅開始。

但畢竟黐手並非詠春嘅全部，只是最為基本及重要嘅訓練方法，練習者不應過份沉醉，否則便誤以為自己高超嘅黐手技藝亦能於「實戰」中使出來。於以前的文章，我提過所有武術均不能完全等於實戰，再者我地詠春嘅黐手係由盤手開始，而盤手(雙黐手)係利用詠春嘅基本手形作出簡單嘅變換，例如上手日字沖拳，轉化成下手伏手；下手攤手則變換成上手膀手。但由於整個練習中，大家便早已橋手相接，就算往後做任何相應動作，也是集中於接觸後嘅事情，相反接觸之前嘅事卻一片空白，從無考慮過。

於搏擊嘅開始，雙方對持著，並沒有任何接觸，大家都是尋求對方的漏洞才會展開攻勢。我唸無人會同對方講:「我地盤手先，之後才正式開打」，就算你咁講，對方都唔會採你。所以有些詠春門人當對上其他武術嘅時候，便感覺無所適從，亦可以話係唔習慣，因為佢地由第一日練習到現在，可能都從未試過由零接觸開始，這就是黐手嘅盲點。

每一樣武術都包括以下元素，例如手法、步法、腳法及一些技撃竅門。有些習武者過份沉醉於黐手練習，只強調聽勁嘅訓練，將詠春嘅其他部份都拋諸腦後。我見到佢地黐手，莽顧了對敵所需要嘅距離感，詠春嘅步法及腳法都通通唔見哂，只係追住對方雙手而作出攻防。有句拳訣「追身莫追手」，意思係就算對方出手再快，再刁鑽，但始終人嘅四肢和身體畢竟是相連嘅，我們只需要留意對方身體嘅晃動，便能預測到對方是出左拳定係右拳還是出腳。若果只盯著對方嘅手看，隨時中了對方後拳或腳都唔一定。

詠春講求中線，亦有好多招式、步法和腳法，於木人樁法裡也能略見一二，這些都能於技擊中使出來。黐手只是我地嘅獨特訓練方法，並不是唯一對敵方法。