感情去到一個無法挽回嘅地步，分手可能就係無計可施之下唯一可以作出嘅決定，但對於忍痛同自己嘅相處左一段時間嘅前度分開，有部分人或者未必會第一時間接受得到，更加需要一段時間先至可以平復心情，令自己習慣番獨處嘅生活，回復正常。

咁究竟分手之後大家點樣先至可以儘快令自己忘卻痛楚，重新出發呢？或者您就應該要避免做出以下8樣事情，令自己沈迷喺已經不能挽回嘅過去漩渦之中。

1. 社交媒體上跟蹤前度

有啲人會因為對前度依依不捨，而決定要喺社交網絡上面繼續跟蹤佢地嘅動向，沈迷了解對方一舉一動，令自己好似同佢地仲有所聯繫一樣。但其實好多時候你見到對方開心同一大班人去玩，或者見到佢有張相同另一個人獨處，您或者會心底裡都唔會好受，覺得佢失去左自己之後生活都一切如常，好似從來都無重視過你咁。如果您仲係忍唔到手經常都會留意住佢地社交網專頁嘅話，咁其實代表左你仲未放得低佢。

2. 強逼自己一個獨處

因為情緒上未能立即調節得到，有部分人會喺分手後一段時間選擇「自閉」一下，唔想同任何人有所交流。需要少少時間平復心情係正常嘅，但如果您係好耐都唔肯同其他人接觸，或者你就係過分沈溺喺過去左嘅關係之中，唔記得左自己除左前度之外，其實仲有自己嘅社交圈子可以交流一下，搵番屬於自己嘅生活。

3. 搵番前度

如果您去意已決，分左手其實就唔應該搵番對方，因為咁就象徵左你仲未放得低對方。雖然或者你會覺得自己同對方係分手亦是朋友，但決定左分手之後就即刻搵番對方，某程度只會拖長您同前度之間分手後嘅冷靜期，令大家都唔會好受，或者令對方以為關係仍有轉機。

4. 講前度壞話

可能您同前度係有唔好嘅過去，但將自己塑造成受害者，不斷喺朋友之間攻擊對方其實就只會令您自己火上加油，越諗越替自己覺得不值，從而被憤怒主宰一切。如果您真係想喺一段感情上回復過黎，您最需要嘅反而係從錯誤中學習，識得搵番一個真係愛惜自己嘅對象。除此之外不斷咁將責任推比前度一個人承受，其實亦都係你無安全感同無自信嘅表現，代表您唔夠成熟承擔自己都有嘅責任。

5. 想像自己重遇對方嘅情境

有部分人因為放唔低自己嘅前度，就會喺腦入面不斷想像自己重遇對方嘅時候應該要有點樣嘅反應，咁先至會增加自己成功箍煲嘅機率。假如您真係咁終日沈迷於自己嘅幻想裡面，咁其實代表左你根本無面對過自己已經同對方已經分左手嘅現實，亦都唔敢接受被放棄嘅現實。

6. 分析雙方誰是誰非

同對方分手之後，可能您就會回憶起喺一段關係之中嘅某啲情節，想睇番自己活著對方邊個曾經出錯，令關係去到無法挽回嘅地步。但其實關係都已經過左去嘅時候，執著於判斷誰對誰錯都係無補於事，更有可能增加您嘅罪疚感。

7. 立即搵過第二個

有啲人因為想令自己嘅前度妒忌，就會立即搵過一個新嘅另一半，希望能夠喺前度面前表現出更加開心嘅生活態度。但其實如果您立即搵過另一個伴侶，結果好可能會令您將眼前呢位伴侶同前度對比，對現任嘅另一半並不公平。

8. 抱有報復心態

如果同對方分手之後因為過往種種嘅不快而想向對方報復，其實咁亦都明顯代表你放唔低嗰一段關係，意味左你想透過復仇嘅舉動令對方知道您依然存在，仲好怨恨佢地添。少少嘅動作例如喺Facebook唱衰對方，其實除左浪費您自己時間之外，更加令人覺得您好小家而且無風度，結果真係得不償失。