《使徒行者》單日票房過百萬 全國單日票房超過六千萬

由寰亞電影發行，邵氏兄弟國際影業有限公司、嘉映影業有限公司、寰亞電影製作有限公司、電視廣播有限公司、天下一電影製作有限公司聯合出品的電影《使徒行者》，已於昨日在全中國及香港同步上映。昨日票房不論中國內地或香港均錄得佳績，香港成為昨天上映的中外新片當中的票房冠軍，全日錄得HK$1,104,260。至於內地票房，全日總計已超過六千萬，成績相當不俗。而且電影口碑凌厲，全城激讚演員演技之餘，對於從電視劇轉化成為電影的作品來說，亦有意外驚喜，不少人表示此作是最富電影感的電視劇延續電影。而首天上畫始終是工作天，不少OL客還未吸納，期待週末電影能錄得更好佳績。

眾演員聽到此消息後均表示欣喜，家輝：「可以拍到一部戲係觀眾都鍾意，就已經心滿意足。今次又去巴西又同古仔超友誼關係咁款，都拍得有血有汗架！當然希望觀眾繼續支持，入場睇多幾次啦！」古仔：「聽到個票房成績唔錯，都開心，希望票房越來越好，然後可以搵機會同成班工作人員台前幕後慶祝一下。」鎮宇：「一直忙緊自己部新戲，已經盡量抽時間去做呢套戲嘅宣傳，聽到有好成績當然開心。好耐冇拎鎗拍戲，今次拍返都覺得好爽。」阿佘：「可以延續釘姐呢個角色去到電影版，我自己都好開心，好開心觀眾會繼續買飛入場支持。我相信入得場嘅觀眾都唔會失望，期待電影快D有慶功啦！同埋多謝觀眾鍾意Q SIR同釘姐。」歡喜哥知道票房成績，都表示開心：「都開心，開心嘅！呢幾日我同阿佘不斷喺大陸做宣傳，全部觀眾睇完都好熱情。每個地方嘅觀眾都好鍾意，我見到咁嘅反應都好開心。」

個個聽到成績好，當然有諗過想做慶功。不過情比金堅嘅兩兄弟張家輝、古天樂，兩個大忙人的檔期似乎好難就得到。電影公司都在極力嘗試安排慶功，當然希望能夠齊人出席。但在度期過程當中，兩人基本上的檔期都是碰不上，似乎這對「離婚男男」唔想太甜蜜露面？

講返劇情，雖然釘姐與歡喜哥會參演電影這個消息眾人皆知，但不少觀眾在看片後均表示對於歡喜哥的出場方式，以及他與釘姐的對手戲均有驚喜。令人意想不到的情節，令歡喜哥與釘姐這對充滿默契的拍檔為電影情節創造了另一個高潮。連同場有參演的張家輝與古天樂也頓時失色，風頭被兩人全搶呢。

不過家輝古仔兩人在戲中的打鬥戲就搶回不少眼球，兩人在戲裡打生打死，由巴西鎗戰打到返香港真功夫，在香港地道餐廳內打到出冷巷，拳拳到肉。家輝想試探古仔係咪卧底，所以約佢來妹記見面，呢間餐廳係大家嘅老地方，都好有感情。係最呈現到兄弟情的一個場口，因為佢地又廝殺，又殺唔落手，然後又有兄弟情湧現，劇組話就連側邊嘅人睇住佢地兩個的戲，都覺得佢地好痴纏。

動作戲本身對於兩位男仕來說已經像食生菜，因為佢地兩個都見慣大場面，不過天花板會冧吊燈，要走避等等呢D場面佢地全部親身上陣，現場工作人員係好緊張的。只係古生就笑大家：「駛唔駛咁緊張？好簡單唶，冇咁易死得。」

其實兩個男人都係強悍類型，絕對唔會輕易講出「好危險」呢啲詞語，現場工作人員其實係覺得危險的呢。因為有一幕戲，係講支鎗直頭貼住古仔下巴來開的，雖然係道具鎗，不過迫真關係都依然有點後助力，點都會有少少擦損。兩個人打交打到好激烈，動作導演錢嘉樂要求係拳拳到肉嘅感覺俾觀眾感覺到嗰份肉緊，同埋兄弟互相撕殺的感覺，所以希望佢地堅打。家輝笑說：打嘅時候我會用盡力去打，將平時佢成日拍戲時裝我彈弓無啦啦爆肚嘅冤屈氣就一次過喺呢場交度打晒出來啦！」

問到家輝細時有冇同人打交嘅經驗，佢都話試過嘅：「冇打過交點算係真男人呀？」睇嚟，兩公婆有時都係要打下交先可以增進友誼，無論佢兩個係兄弟定係夫妻，都係咁話啦！