(圖片來源：http://www.ssd.noaa.gov/)
熱帶氣旋妮妲逐漸逼近香港，一眾打工仔最關注嘅，當然就係如果掛8號波，可唔可以「賺」到一日假，定還是個風唔會喺上班時間造成太大破壞，聽日大家照舊齊齊早啲起身番工？不過，預測風向呢啲科學估算就交畀天文台喇！喺確切掛8號波之前，不如我地睇吓香港以外嘅台灣、日本同韓國嘅颱風假安排啦！
台灣
當地政府制定咗「天然災害停止上班及上課作業辦法」，由政府各級機關，公、私立學校同公營事業機構，根據實際情況同準則發佈停班停課安排。遇著打風，情況同香港類近，都係依照天氣預報，平均風力達到七級風或陣風達到十級風就會有放假安排。
日本
喺地理上日本位於高緯度，當颱風去到嗰時，風力同雨量都已經減弱。而且就算真係打風，由於日本行政區範圍太大，都係畀日本公司自行決定放唔放假。不過，責任心重嘅日本人大多會以公司行先，聽聞佢哋知道外國有颱風假時，唔會講「好羨慕」，反而係擔心「工作點算？」甚至有人話，見過日本上班族遇到颱風時，會特登住喺公司附近嘅飯店，方便番工，甚至有人喺打風時住喺公司度添！
(圖片來源：reactiongifs.me)
南韓
當地官員話，每個星期放兩日假已經令工作時間少咗好多。所以，當地除咗冇公眾假期同週末撞期嘅補假之外，原來南韓直頭冇颱風假！不過，考慮到學生嘅安全，教育部都會尊重學校校長決定權，可以視乎情況宣布停課。
另外，當地消防部門會主動向國民通報預防颱風措施，例如唔好出海同登山等。而「世越號」事件後，政府成立國民安全廳，當打風時，市民就會通過手機短訊收到「颱風注意警報」。
(圖片來源：koreasquirrel.wordpress.com)
無論有冇颱風假都好，其實打風時最緊要都係留喺安全地方，戶外活動就可免則免喇！仲要記得喺颱風接近前做好防風措施呀！
