一個人隻身去日本，可以話係唔少香港人嘅家常便飯。但您又知唔知道有啲動作做左之後，其實有機會令人會錯意，惹來意想不到嘅狂蜂浪蝶嘅呢！？唔想超尷尬地向當地人發放出錯誤訊息，咁你就快啲留意一下下面呢4個男同志所使用嘅暗號，唔好對人無意思都錯用呀！
1. Locker鎖匙掛喺左腳踝
去日本唔少人都會去澡堂輕鬆一下，而大部分澡堂嘅設施都係會有Locker比大家擺放個人物品，並且會喺提供鎖匙比大家之後認領。但如果您貪得意將Locker鎖匙掛喺左腳踝，咁你或者就會令人誤會，以為您正係發放緊一個暗號想識男仔。
2. 接收人地手上嘅廁紙
如果突然間有一位陌生人向您遞上一張廁紙，而您同佢根本係毫不相識，咁就有機會代表佢對您有意思。所以假如您唔知頭唔知路，就咁接過佢手上嘅紙巾，你就即係接受左佢嘅邀請，會同佢進一步發展。
3. 輕碰雨傘
下雨天撑住雨傘企喺日本新宿二丁目嘅街頭上等過馬路，突然左邊嘅陌生男子就用自己嘅雨傘輕碰你嘅雨傘。除左可能係佢唔小心之外，假如您發現佢係刻意咁樣做嘅話，咁就代表您已經成為左佢嘅目標。接受佢嘅邀請嘅話，只要輕碰佢嘅雨傘回應就得。
4. 握手時比人用手指抓手掌
握手係唔少外國國家都會採用喺嘅一種打招呼方法，但如果喺握手嘅過程之中，對方無緣無故用手指輕輕咁抓你嘅手掌，咁或者就代表佢啱啱比左個邀請嘅暗號你。
