啱啱同自己嘅另一半分左手，覺得非常悲傷又有啲唔習慣，好想嘗試修補關係再次喺埋一齊？如果您有咁嘅諗法，或者您應該「停一停，諗一諗」，因為每一段感情之所以會步向終結嘅一刻，其實就正正代表左當中出現左令二人分開嘅超然距離，而且更加係單方面或者雙方面都無法拉近彼此差距。
聽完上述分析之後，仲係覺得你同前度有機會復合？咁就請您嘗試回答以下6條問題，反思一下您地兩個之間嘅關係，先至再決定係唔係真係想同佢喺番埋一齊啦！
1. 你地最初係因為乜野原因分手？
當人被愛蒙蔽雙眼嘅時候，回憶就總會係變得非常朦朧，而未來則相反係充滿希冀。雖然回憶往事會令您感到傷痛，但您更應該因此回想起您同佢原本選擇分開嘅原因，令自己冷靜分析您同佢嘅關係。當您睇清楚你地係因為乜野嘅原因而令關係結束嘅時候，您就可以客觀衡量出重燃呢段關係究竟值唔值得。
2. 點解我想同佢喺番埋一齊？
究竟你想同佢喺番埋一齊嘅原因係乜野？係想暫時修補關係，定真係有決心要同前度一齊克服過往所遭遇嘅難關？要同前度重新出發，所需嘅耐性同勇氣其實都非常之大，需要您付出更大嘅力量先至可以重新拉近兩人距離。假如您覺得自己可以為前度付出咁大嘅力氣改善關係，而且認為自己嘅真誠能夠打動到佢，咁你先至可以考慮嘗試同佢喺番埋一齊。
3. 冷靜期時間夠嗎？
如果您同前度分手只係一段好短嘅時間，或者你就應該冷靜諗清楚自己係唔係一時衝動先至想同佢喺番埋一齊。想以清醒嘅頭腦睇清楚自己同佢嘅關係？咁你就或者應該試下獨處一陣，避免同佢有任何接觸一段時間，睇下時間有冇將您心靈入面嘅空虛填番滿，發現自己失去嘅並唔係你嘅前度。
4. 兩者之間嘅問題係唔係可以迎刃而解？
坦白嚟講每一個人都有自己嘅底線，而從呢方面考慮之下您究竟係唔係真係可以放低身段，去接受另一半嘅過錯或者係放棄自己嘅底線去迎合佢地呢？假如你唔想日後喺番埋一齊之後日日以淚洗面，經常同另一半發生磨擦，您或者就需要再三考慮一下，睇下自己係唔係真係可以降低自己嘅要求去全面配合另一半。
5. 您嘅家人同好朋友有乜野意見？
「旁觀者清，當局者迷」，當您作出任何決定嘅時候，或者都應該詢問下第三者意見，睇下會唔會真係單純係自己一廂情願，令您墮入自己嘅幻想之中不能自拔，睇唔到前度對您嘅種種不妥當或者佢地嘅缺點。
6. 分手之後您變左幾多？
人係會長大嘅，而喺經過某啲挫折嘅時候，人亦都潛意識地從錯誤中學習，識得從唔同嘅角度看待事物，同以前嘅您完全唔一樣。換句說話講自從分手之後，您或者就會因為自己已經成長而對前度有著另一個觀感，而同一時間經過時間洗滌之後，您嘅前度都會有著一定改變，或者已經唔係您從前認識嘅佢一樣。
