香港人工時咁長，唔想日日番工都喊哂口面、腦閉塞之餘，工作效率又低？即刻睇睇呢7個辦公室小貼士，跟住學，番工實精神爽利，到時升職加薪在望啦！
1. 增添「綠」意
有研究發現，喺室內擺放小盆栽可以改善心情同激發創意。部分做完手術康復緊嘅病人，如果病房入面有植物或者花，佢哋嘅血壓會低啲，而痛楚同疲勞都會少啲㗎！所以不妨喺做嘢嘅地方擺放鮮花啦！
2. 個人化擺設
將自己嘅工作間個人化原來都可以增加工作效率㗎！一啲個人相片同裝飾可以幫人喺面對壓力時，維持平穩嘅情緒。如果喺開放式辦公室做嘢，呢啲個人化物品仲可以幫手增添番私隱度添！
3. 避免分散注意力
如果工作環境唔容許閂門，可以考慮戴耳機。有研究發現，打工仔一日可以有86分鐘因為受到噪音影響而浪費咗！
4. 親親大自然
即使唔可以望到窗外優美嘅風景，都唔好放棄任何可以見到「大自然」景色嘅機會！就算係電腦嘅墻紙，或者只係望住草地40秒，原來都有助提升專注力同表現。
5. 唔好喺工作檯食晏
離開工作枱，真真正正出街食午餐，可以令腦部休息一下。另外，一邊做嘢，一邊食飯，原來會更易令人唔覺意咁食咗過量嘅食物㗎！
6. 多啲郁動
試下多啲企起身活動下，話唔定可以提升工作效率㗎！如果可以，企喺度開會討論問題，聽講可以加強合作添！
7. 混亂嘅藝術
雖然已經有好多人講過一張整齊嘅檯面會帶嚟好多好處。不過，原來又有研究指，唔整齊嘅有助激發創意喎！咁睇黎「亂中有序」至係致勝之道喇！
