夏日炎炎，要消暑嘅話，唔好成日都去商場嘆冷氣咁無新意啦！世界各地嘅城市，有好多都係游水勝地，環境靚之餘仲有好多水上活動玩！趁夏天一於去番轉游水消暑之旅啦！
丹麥 哥本哈根
哥本哈根嘅Amager Beach Park入面有個兩公里長嘅人工沙灘，好多人都會喺度玩各式各樣嘅水上活動，例如衝浪、划艇等等。而嗰度每逢夏天都會有特別多活動舉行，好似戶外演唱會，甚至露天婚禮等，認真多姿多彩呀！
瑞士 蘇黎世
去瑞士除咗可以去阿爾卑斯山嘅河流湖泊游水之外，蘇黎世入面都有18個游水熱點，全部都有一流嘅環境！當中Tiefenbrunnen swimming beach就喺正蘇黎世湖隔離，望住咁靚嘅湖游水，認真舒服呀！游完仲可以去按摩添！
英國 倫敦
游完水怕肚餓揾唔到好野食？唔怕！倫敦南部嘅Brockwell Lido入面就有一間時尚嘅咖啡室，入面嘅食物好食又精緻，游完水去醫肚一流呀！至於Tooting Bec Lido就位於倫敦西南部，有91米巨型泳池，啱哂鐘意瘋狂練水嘅朋友呀！
加拿大 溫哥華
加拿大嘅Third Beach環境非常寧靜清幽，有時想靜靜地享受下大自然就啱哂喇！而Stanley Park seawall平靜嘅水面就十分之適合大家慢條斯理咁游下水。
澳洲 悉尼
(圖片來源：Flickriver)
講到沙灘，又點可以唔講充滿大自然氣息嘅活力城市悉尼呢？Clovelly Bay呢個海灣有350米長，當地人仲好鐘意喺嗰度玩浮潛添！
葡萄牙 里斯本
一個一望無際嘅海灘，幾時都係咁吸引！就好似喺里斯本市中心以東嘅Cascais咁，就係一個又長又廣闊，同時又有無數壁綠海浪既海灘。 要去Cascais既方法除左可以選擇鐵路之外，亦可以乘搭由Inspiration Marta Hotel所營運嘅穿梭巴士，佢地分別由Carcavelos同Guincho開出，十分之方便。
法國 巴黎
(圖片來源：timeout.fr)
咪以為法國咁浪漫就冇戶外活動呀！法國每年都會舉辦「巴黎海灘」活動，今年就喺7月19號至8月17號舉行。到時塞納河岸的部分地區就會鋪上沙粒，形成人工沙灘。「巴黎海灘」活動非常之受歡迎，每年都會吸引數以萬計遊客去玩！
美國 紐約
喺1936年開放嘅McCarren Park pool就絕對係經典之選呀！歷史悠久得黎，到宜家都係咁受歡迎㗎！而Astoria Park入面就有個50米奧運標準池，又係練水嘅好地方。
德國 柏林
Wannsee萬湖沙灘1907年開放，憑住清澈見底嘅淡湖水，至今仍然深受當地人歡迎。而東部嘅Muggelsee就有小童遊玩範圍，最適合一家大細齊齊去玩！
巴西 里約熱內盧
巴西即將舉行奧運，去睇賽事之餘不妨去Copacabana沙灘，感受吓巴西熱情嘅氣息啦！
