兩個人走埋一齊，如果係非常投契而且大家都知大家心入面諗緊咩，難免就有機會萌生出曖昧關係。但究竟咁樣發展落去，係唔係真係會有好嘅結果？
正所謂「戀人未滿，友達以上」，其實有好多時候大家繼續保持朋友關係，總比成為情侶嘅好，假若您發現您嘅對象同您相處嘅事後有下列7個特徵，或者你就要三思將關係推進嘅想法，睇清楚大家係唔係真係適合對方。
1. 唔敢單獨同對象出街
好多人因為仲係同對象關係曖昧，習慣就會用約第3個朋友去街做藉口，問對象有冇興趣一齊。假如您到而家都要有個電燈膽陪先敢同佢出街，完全唔敢同佢單獨相處，咁你或者都係停一停諗一諗，因為似乎你同佢喺埋一齊嘅時候感覺係超級尷尬，做唔到自己。
2. 同佢一齊會心不在焉
如果同佢喺埋一齊嘅時候，你經常會習慣心不在焉諗其他野，或者將專注力放喺其他有吸引力嘅人身上，想像自己同佢地喺埋一齊會點，咁或者就意味左您並唔係太過重視你身邊嘅呢位對象。
3. 想法南轅北轍
假如你地兩個對未來嘅目標意見不合，南轅北轍，其實就會令您兩個互相牽制住對方，令大家喺互相遷就下無法出盡全力完成原本訂下嘅目標，從而讓雙方難受。所以假如你唔能夠放低自己嘅目標去完全支持自己嘅另一半，又或者接受唔到對方唔認同你正在追求嘅目標，你就要考慮一下兩個人嘅關係能否維繫落去。
4. 睇唔到同佢有將來
除左兩個人想法南轅北轍，會令大家之後嘅路好難行之外，如果您係唔能夠想像自己同佢喺埋一齊5年後會有點樣嘅將來嘅話，您似乎就只不過係想有個人喺自己身邊就算，並唔係想同佢長相廝守，計畫未來。因為假如您係認真看待對方嘅話，您其實必定會諗到要為兩個人之後嘅路打算，而並非好似普通朋友咁出嚟見下面，唔需要考慮例如組織家庭等問題。
5. 喺性方面無任何火花
親熱次數頻密與否並唔係量度二人關係嘅重要指標，而係大家喺埋一齊嘅時候有冇被對方吸引，引發出性方面嘅追求先至係呢項條件嘅重點。假如面對住呢位對象嘅時候，你對性方面無任何渴求，咁其實就代表左你地雙方並無任何火花，又或者係永遠都唔會有。
6. 過分低調
面對好朋友提問你同對象關係點嘅時候，您只會冷冷回答「都係咁啦，無咩野特別。」其實咁樣係意味左你同對象關係停滯不前，亦唔想比其他人知道，以及自己唔想面對事實。
7. 感覺受困
如果您同對象相處嘅時候有啲唔舒服，而且有少少覺得自己比對方控制住嘅話，您或者就要重新考慮應否同佢繼續發展落去，因為再走落去大家都忍受唔到對方嘅時候，您地或者會連朋友都無得做。
