為左要喺自己嘅心儀對象面前留下深刻印象，有啲人就會選擇喺約會嘅時候一反常態，做出一啲平時唔會做嘅事情，希望能夠為自己塑造出正面形象，吸引對方。但當一個人對自己太有自信嘅時候，好多時就會令自己非常盲目，忽略左自己對象嘅感受，喺對方腦海中留下負面印象。

咁究竟對於女士黎講，男人有啲咩野嘅行為其實係反而會令佢地非常反感嘅呢？最近，外國網站就訪問左唔少女士，並且總結出12個男人令女人討厭嘅行為，大家真係要睇清楚唔好錯犯呀！

1. 吹水唔抹咀

為左討好女仔無所不用其極，吹水吹到無句真前言不對後語，仲扮到係成功人士咁，之後仲對啲女仔毛手毛腳咁。其實女仔對於咁既男士，一眼就睇得出佢嘅企圖。相反如果一個男仔係正正常常，無咁衝動嘅話，其實係更具吸引力。

2. 親熱時候亂掉衣物

當同男朋友親熱嘅時候，女仔原來係好在意你地點處理佢地嘅內衣褲，例如隨意掉晒落地嘅話佢地就會覺得好唔舒服，畢竟之後佢地都係要著番架嘛...…

3. 懶型但無禮貌

有啲男士為左個「型」字，真係咩野都做得出，包括唔記得左其實禮貌係更加重要。為左一個「型」字而無理得罪其他人，咁自我中心嘅人又邊度會有人鐘意丫？

4. 搵佢時就玩失蹤，佢搵你就要即刻到

有人會問呢個唔係女人先有嘅習慣嚟嘅咩？顯然女方有時都會遇到咁嘅問題...…接受訪問嘅女生投訴話，其實唔少人男士都會咁樣唔覆msg，但當佢之後想約你出街卻就會無事獻慇懃。對於咁樣嘅做法，女仔自然同樣覺得反感。

5. 問你食咩話無所謂

因為揸唔定主意，所以先問您有冇咩想食，但到頭來又交番個波比女方，所以就令佢地非常反感。但其實對於男仔嚟講，揀錯女方唔想食比唔揀可能下場更加淒慘，睇嚟女仔未必明白佢地嘅苦衷。

6. 太注重健身而唔食呢樣唔食嗰樣

女人因為纖體而需要節食，唔少男士都會覺得佢地小題大作，非常麻煩。同樣地假若男方因為健身而呢樣唔食個樣唔食，女士都會覺得對方非常麻煩，甚至係煩厭。

7. 講正經野都無嚟認真

有部分男士因為性格問題，就算喺認真關頭都會保持輕鬆嘅說話方法，又會搞下gag。但原來咁樣嘅男士對於女士嚟講其實係令佢地好唔鐘意，覺得佢地做究唔認真。

8. 唔鐘意男人打機

無錯呀係呢個調查入面，有女士表示佢地其實好討厭鐘意打機嘅男士，話情願佢地鐘意打高爾夫球都唔想佢地打機咁話。但講真到時如果佢地男朋友係鐘意打Golf，佢地到時又會話唔想要全日曬住喺球場架啦....…

9. 已讀不回

睇完Whatsapp又無即時回覆，咁樣對於女仔嚟講係絕對唔能夠接受，會令佢地覺得唔受到尊重。

10. 懶惰

對於日常嘅每一樣事物，例如工作、個人外觀、技能都懶於作出任何努力，唔花時間去進一步學習或者鑽研，對於女士黎講，咁懶惰嘅男人就等同於毫無任何目標，而且亦代表左佢地唔會為未來打算同奮鬥。

11. 喺朋友面前就第2個樣

有部分男士喺朋友面前，對待身邊女生嘅態度會係180度轉變，例如無端端變成非常大男人，無晒風度咁樣。見到男士原來根本係一個雙面人，女士自然就額外會有戒心。

12. 八卦

當一班人圍埋一齊，而男士選擇講人壞話，特別係討論女士身材等話題嘅時候，唔少女仔都覺得受到冒犯，覺得佢地除左想同人上床之外就無第二樣野，難怪會令人感覺印象負面。