近年來因為明星效應，唔少朋友都樂於加入勤做運動嘅行列，每星期都會抽番少少時間跑下步，又或者去健身室鍛鍊一下等。有時就算係無咩時間，居住環境比較有限嘅香港人或者都會嘗試喺屋企伸展下筋骨，例如簡單做下sit-up咁。
運動沒錯本身係強身健體嘅，但你又有冇曾經諗過其實姿勢或者做法唔正確，反而係全無效果，而且更會整傷自己？
對於坊間唔少人流行做嘅運動，一班外國嘅專業私人教練就整理出以下8大絕不建議嘅健身方式。如果你有自己做開以下運動嘅話，或者真係要搵番個專業人士睇下自己有冇做錯，避免越做越傷身呀！
1. 橢圓機
橢圓機係健身中心裡面最受大眾歡迎嘅健身儀器之一，但係站在外國INFighting Shape健身中心教練及創辦人愛德華·拉什立場，使用橢圓機並唔係一種有效嘅帶氧運動，而且姿勢錯誤更有機會相反惡化膝蓋關節。因此假如你想以類似嘅運動強化膝蓋關節，緩解膝蓋疼痛嘅問題，拉什反而建議你掌握正確嘅深蹲訓練及跑步姿勢，咁樣總比依賴橢圓機較好。
2. 棒式訓練
可能因為受到家庭環境限制，「棒式訓練」呢項看似簡單嘅健身方法突然就受到唔少人士歡迎。雖然「棒式訓練」嘅要求似乎就只不過係要求大家以特定嘅姿勢，靜止地支撐身體鍛鍊肌肉，但根據健身教練傑西卡·桑德嘅解釋，錯誤姿勢例如喺訓練過程中垂低頭、肩膀同手腕唔係成水平線、胸口無挺直，或者過度太高屁股，其實都係會減低運動效用，長遠更有機會傷身。
3. 史密斯深蹲
雖然一般黎講，每一家健身室都基本會有史密斯深蹲嘅儀器，但係對於練習蹲呢個動作嚟講，利用儀器去輔助其實會減低您使用腿筋嘅程度，令您依賴左儀器上面嘅刻度完成動作，達成目標。
4. 前平舉
前平舉即意味要將啞鈴或者槓鈴抬高至下巴位置，但教練湯姆·霍蘭表示如果姿勢唔正確，好多時大家都會提起左肩膀嘅關節令個一個部分容易受傷。因此，霍蘭建議大家練習普通正面和側面舉鈴。
5. 跳箱訓練
要提升下肢力量，唔少嘅人都會選擇跳箱訓練，加強腿部肌肉。但由於呢種運動係會提升心跳率，因此對於身形肥胖或者體能未如理想嘅人黎講都係好重負荷，而且更會令到膝蓋及小腿受壓，容易造成膝蓋肌腱炎等問題。相較跳箱訓練，普通跑步其實更為有效鍛鍊下肢肌肉。
6. 坐姿髖外展運動
好多人以為集中做坐姿髖外展運動係減屁股嘅最有效動作，但其實從健身教練嘅角度嚟講，人嘅身體係只會按住基因預定嘅規律消除體內脂肪，因此我地係無法集中減某一部細小嘅部分。對於要減臀部嘅朋友嚟講，最有效嘅方法其實係以深蹲運動全條腿。
7. 撐體
健身教練喬西·格林韋爾解釋就算撐體動作姿勢正確，好多去健身室嘅朋友都會習慣左只鍛鍊兩邊肱三頭肌，而忽略左同時都要鍛鍊胸部肌肉，所以好容易就會令到肩膀負擔增加，長久更會令該個部位嘅關節受傷。相比撐體動作，格林韋爾較為建議大家做簡單嘅掌上壓。
8. 倒立掌上壓
倒立掌上壓雖然難度非常之高，但仍不乏鍛鍊呢套動作嘅朋友，挑戰一番。但對於呢種睇落好霸氣嘅動作，健身教練賈森卻認為除非你係雜技團演員，如果唔係根本唔值得你花時間去練，因為倒立掌上壓係會令肩膀受壓，唔正確咁落地更加係有機會造成頸部受傷。如果你嘅目標只不過係想變得fit啲又或者減肥，健身牆球運動其實就能夠運動全身肌肉。
