「世上只有媽媽好」係唔少人經常掛喺嘴邊嘅一句說話，意指大家就算遇上咩嘅困難都好，大部分嘅人嘅阿媽都會第一時間出手相助、赴湯蹈火，所以全世界上面對自己最好嘅，都一定會係自己阿媽。
但係究竟點樣嘅阿媽先係令人敬重到五體投地嘅型格媽媽呢？雖然每一個人嘅定義都可以好唔同，但講真如果你阿媽喺以下12點裡面都有中左唔少項嘅話，咁就真係恭喜晒你喇，因為你媽媽真係超級無敵，簡直係令人既羨慕又妒嫉呀！
▼從來唔會喺你朋友面前失禮▼
有啲阿媽會好唔識趣，明明你有朋友喺度都講埋啲唔想比人知嘅黑歷史，例如講番舊時你番學瀨屎比女同學笑咁，遇到咁嘅情況你又唔可以第一時間話佢，搞到自己咩面都無晒。相反如果你阿媽係好醒目嘅話，識得喺適合時間迴避或者提供協助，咁就真係超級無敵喇！
▼同你一致槍頭對外▼
啲三姑六婆師奶好煩好八卦，成日都聽到佢地喺屋企附近講呢個講嗰個，又鐘意將whatsapp留言當真咁傳出去？好在！你阿媽同佢地係完全唔同Level嘅，仲同你一樣識得唔鐘意埋啲同一類嘅人。果然係兩母子呀下！
▼同你音樂品味一樣▼
聽聽下歌阿媽忽然拍左拍你膀頭，問你聽左你鐘意嘅某個歌手嘅某一首demo未... 哇！唔好玩啦咁樣真係型到爆炸！第時去睇gig都可以帶埋佢去呀！
▼串串貢但係好有幽默感▼
比阿媽直接咁當面潤，其實真係唔係太好受，但如果佢係識得用個gag黎話你，咁又真係令你唔知好嬲定好笑，覺得自己好似無咁難堪咁。
▼教你追女仔勁過你啲friend▼
同朋友講自己鐘意左某某，佢地就剩係識叫你約人出街同埋教埋啲旁門左道，聽完仲驚過無問過佢地建議。相反同阿媽講佢真係醒番啲唔會過時嘅追女仔tips比你，睇黎佢真心想飲番杯新抱茶！
▼你有女朋友佢仲開心過你▼
續教你點樣追女仔之後，當您搵到女朋友之後，你阿媽佢仲開心過仲六合彩？咁代表嘅係佢真係鄧你高興，關心你呀！
▼有咩都係一家人▼
自己遇到啲咩嘅挫折，阿媽都會叫晒成家人黎睇下點幫你手，又或者有咩好野，阿媽都一定會等埋你先分享慶祝。仲駛講點解咩？大家都係一家人丫嘛！
▼唔會擺阿媽款▼
平時同佢相處佢絕對唔會仲當你係細路仔咁有所顧忌同管住晒，有時仲會激動到同你一齊講埋粗口，絕對唔會有PG家長指引。其實都係嘅都咁大個人，仲使咩擺個阿媽款出嚟丫？
▼講野無代溝▼
如果你阿媽睇得明，兼且識得用潮語，咁佢同你真係幾乎無代溝，而家潮流facebook講咩都可以同佢吹下水。問心有幾多個阿媽會勁到連你個輩關心嘅野都識架！？
▼在所不惜保護你▼
就算有機會賠上自己嘅前程，阿媽都會瞓晒身咁在所不惜救你。為左自己嘅骨肉連自己都可以捨棄，根本就是最原始嘅母愛表現！
▼識得守秘密▼
有啲咩屈住喺心入面，同其他人講會好驚傳左出去，但同阿媽講佢就一定會幫你守秘密，仲會同你一齊研究點解決。咁樣做嘅原因就只有一個，就係意味左佢非常尊重你。
▼會同你講佢嘅醜事▼
兩母子無秘密，仲同你分享埋自己嘅醜事等你學精唔會觸礁，完全體現出佢真係真心點條容易行嘅路比你行，等你唔會重蹈覆轍。
