唔少鐘意睇書既人，一定會買定幾張靚靚書籤傍身，而書籤一般都係紙、咭既質地，換嚟換去最多得上面個圖案唔同。一向創意十足既日本人，今次喺線上購物平台Tokyo Kitsch推出「另類」書籤，唔單止質地唔同，仲可以話「賣相十足」，滿足哂各位愛書人「邊睇邊食」既願望！
1. 煎蛋
太陽蛋係唔少人既至愛，如果睇書既時候可以同時「品嘗」就好喇，而呢張太陽蛋書籤唔單止似，仲幾乎「煎」咗一隻完美既太陽蛋！
2. 煙肉
呢塊煙肉肥瘦啱啱好，同真既無分別，如果將書籤放喺陽光照射住，感覺比起平放喺枱更通透，更似真既一樣。
3. 雪條
如果淨係睇書籤頂的話，你可能會以為佢只係一張普通既淺藍色書籤，但只要睇哂成張，你就發現佢真身係一條有埋雪條棍插住。
4. 三文魚塊
呢塊三文魚塊，無論皮同肉睇落都好均稱，再加埋表面嗰啲油同光澤，真係睇到都流口水！
5. 熱香餅
迷你熱香餅睇落十分可愛，而重點係上面有埋醬同牛油，成個設計可以話超細心！
6. 西瓜
嗱講真，呢片西瓜像真度唔算高，主要係西瓜肉既色好似紅得滯，上面嗰兩粒核又唔多夾咁；但係，精粹在於執邊崩咗嗰一忽，西瓜咬咗一啖，個感覺又幾真實既！
7. 紫菜
呢塊紫菜，無論光澤定係質地都做到同真既無分別，一樣係好乾身好薄咁；如果將佢同真既紫菜放埋一齊，絕對係「難分真與假」。
圖片來源：Tokyo Kitsch
