薛凱琪為新歌 敷冰忍痛排舞

早年因為跳舞傷及左右腳膝頭兩邊組織，未有好好就醫處理的Fiona薛凱琪，近日正為全新廣東快歌積極排舞的她，再次被膝患問題纏繞，為減輕痛楚，只好在排舞休息時間，以冰袋凍敷患處，舒緩痛楚。

「其實半年前已經照過磁力共振，發現有積水同膿，軟骨組織亦出現磨蝕，所以唔好講跳舞，我行路行得耐都會膝頭痛。」Fiona說。

Fiona遵照醫生吩咐，最近再去照磁力共振，報告結果令Fiona相當頭痛。

「因為情況嚴重咗，醫生要我停工半年做物理治療，期間我要日日用護膝包住膝頭，但我近排要開始排舞，5月要拍新歌MV，6月又要埋位拍戲，根本冇可能停工半年。」

健康雖然重要，但Fiona仍堅持工作行先，像早前現身金像獎頒獎禮，即使穿高踭鞋會傷及患處，亦只能忍痛頂硬上。

「所以我除咗排舞敷冰袋，平日我會响膝頭黐彈性運動貼，再外加一塊人哋用嚟黐腳板底嘅袪濕貼，我就用嚟貼膝頭，之後再用護膝包住，既可以保護又可以吸濕，塊貼我真係貼到成塊濕晒，當然唔少得抽時間去做物理治療吧。」

Fiona知道膝頭情況不能再拖，唯有盡力保護，她說：「我信神，我會祈禱希望天父賜我最好嘅治療方法，希望年底拍完戲，真係可以有時間停工做治療。」