喺職場上打滾左唔少嘅年頭，大家應該都有唔少嘅見工經驗。唔知道大家喺見工嘅時候，有冇試過比人問埋啲過晒火嘅問題，好似就連自己另一半同家宅都比人查埋一樣，非常離譜！

原來有試過嘅話，你並唔孤單。因為根據英國一個招聘應用程式Debut嘅調查，職場上逾40%嘅女性就曾經在見工嘅時候，被招聘一方問及敏感，甚至是涉嫌性別歧視嘅問題，比只有12%的男性為多。

假若你日後不幸喺面試中，遇到雇主問及以下嘅問題，或者你就真係要再三思你要加入呢間公司嘅可能性喇！

▼人際關係篇▼

「你結左婚未？」
「你另一半係做咩工作？」
「假若你獲派到海外公幹，你宜家有冇拍緊拖，或者有冇試過Long D？」
「你係唔係同屋企人／另一半一齊住？你覺得自己會唔會同另一半結婚，同埋生仔？」
「你父母係唔係離左婚？」

▼家庭友善篇▼

「我地想知道你工作時間上，會唔會配合到我地彈性嘅工作時間，你點樣可以平衡番你工作同照顧仔女嘅時間呢？」
「我地想搵嘅係一個單身嘅後生女，因為佢地較少機會請到產假。」
「份工需要你去外國公幹，如果你有左嘅話，我請你又有咩用？點解你會放棄你嘅事業？」

▼應付實際情況篇▼

「有人講粗口你覺得可以點處理？」
「我地人工就真係得咁多嘅者，你會點樣運用你嘅薪金？」
「你個Team係全男班，你會唔會覺得你身為女人會應付唔黎？」
「你知唔知你應該要執垃圾？我地唔會請有公主病嘅女仔。」
「你有冇信教？」

講真，如果真係遇到雇主咁樣問自己問題，唔知咩係個人私隱，又講埋晒啲性別歧視嘅嘢，真係可以即時講byebye，千祈唔好回頭。

點解？因為如果佢見工都已經可以咁對你嘅時候，做起野上黎可能情況會更加之差，或者佢間公司嘅文化就係咁，令你第時係要應付唔單止係佢一個針對你嘅人。

所以你去見工嘅時候除左係人地揀你，最緊要係要記得你都係同時揀緊人架！唔好因為薪金高就盲目講YES，記得要睇埋間公司先好呀！

來源：英國《每日電訊報》