縱橫職場唔少年頭，大家應該都見過好多奇葩老細。例如明明已經200分成功完成晒手頭上嘅工作，總之麻煩老細都可以搵到個位黎鬧你，問你點解唔做得更加好一啲。而且更令人非常煩厭嘅係佢地更加係超級鐘意「今日嘅我打倒昨日嘅我」，明明之前自己講過又會唔算數，仲賴係你記錯咁話。
對住呢啲咁既麻煩老細，究竟點樣先可以將自己提升到化境嘅階段，同時又可以喺無意之間窒番佢轉頭，激死佢呢？
▼木無表情對住佢▼
麻煩老細叫得你入佢房？咁就即係佢有野捉到你黎話，有野諗到要鬧一鬧你咁。所以喺呢種情況發生左嘅時候，首先你就要冷靜自己咩都唔好諗，抱住「我睬你都晒氣」嘅心情去搵佢，一啲反應都唔好比佢。當佢見到你鬧極都唔嬲唔怕嘅時候，佢自自然然就會無心情繼續鬧面前呢個紙牌公仔落去，叫你出番去自己做野。
▼重覆每一句佢講嘅野▼
有啲老細會覺得自己好醒，成日爭住教你點做點做，但唔明白每個人做野都有自己嘅一種方式，唔可以套用喺每一個人身上。另一個情況就係明明佢個教法根本就唔可行，佢都會夾硬覺得佢個方法係得嘅，完全離地。咁喺呢個情況發生嘅時候，你或者就可以試下重覆講番佢講緊嘅指令出黎，等佢知道自己講嘅要求係幾咁荒謬。
▼佢講笑話嘅時候唔比反應▼
麻煩老細喺好多嘅情況之下，都一定會搵個位黎講個笑話，用黎營造出自己親民又唔介意同下屬一齊講笑嘅氣氛，但內裡卻相反小器到死。當麻煩老細講左個笑話嘅時候，無論係人多定人少、係唔係真係好好笑，唔比反應佢就最能夠令佢變成全場最愚蠢嘅焦點所在，等佢以為自己出醜，講左個無人明嘅爛gag。
▼佢發火時你冷靜▼
當佢發晒爛渣，以人身攻擊嘅角度鬧你嘅時候，你就一定要成為冷靜理性嘅一方，唔好比自己淪落到佢咁低莊。然後當佢要求你出句聲回應嘅時候，你仲可以反為質疑番佢完全失去理性，無咩可以傾到落去。仲有記住喺佢發晒爛渣嘅時候，唔好用太長嘅語句回覆，一兩個字表達到意思就算，因為佢都唔係有心同你傾。
▼引用番佢講過嘅野▼
老細「五時花六時變」，好多時候呢頭講過嘅野，下一刻就可以唔算數，仲衰過啲金魚。所以下次佢對您有任何嘅指令嘅時候，收到果一刻一定要完整同佢覆述番一次先，等佢肯定你無理解錯。Email嘅話都一樣，重覆確認佢講過嘅野回覆番佢。之後如果佢秋後算帳，你就可以一字不漏咁拎證據出黎，同佢對質果時confirm過咁做／email白紙黑字寫明係咁做，等佢無得抵賴。
▼提番佢佢先係老細▼
有啲老細做咩都好，都鐘意首先擺番個老細款出黎，成日都要提醒你佢先係老細，好似要您無時無刻都膜拜佢咁。當然對住呢啲咁既老細嘅時候，自己身為小職員嘅就一定唔好亂作決定喇！所以無論事件大小都好一定要提番佢佢係老細，應該咩野都知，咩都係佢先可以做決定，句句都老細前老細後，煩死佢為止。
▼喺適當嘅時候辭職▼
公司呢排有好多大project要跟忙到七彩，人手又明顯唔夠？呢個就係最適當辭職嘅時候，進行您嘅復仇大計。講真佢臨時臨急請個新人番黎又要train過晒，又要同時跟十幾廿個project，一定做死佢啦！？但呢一切都唔關你事架喇，通知期過左之後你就係神仙喇～ 職你就辭左架喇，扮工mode啟動！
