▲（網上圖片）
自從政務司司長林鄭月娥一句「官到無求膽自大」後，官員說話就開始有骨。今早立法會繼續辯論人民力量議員陳志全，就《版權修訂條例草案》提出的「休會待續」動議。早前商務及經濟發展局局長蘇錦樑明言，若本周不能通過《草案》，《草案》將會「作罷」。蘇錦樑發言時，就拿出一本應該從圖書館借來的金庸著作《倚天屠龍記》袖珍本。
蘇錦樑指書中各大自稱的名門正派，為了口中的公義及團結，聯手圍攻眼中的敵人，其實暗地裏各懷鬼胎，自有盤算，垂涎屠龍寶刀，「呢個正正係我哋條例所處嘅情況，各黨各派嘅泛民議員為咗口中嘅網絡公義，透過不切實際，嘩眾取寵嘅手段，好似拉布同推出冇可能取得共識的嘅修正案等，誓死要推倒條例草案。」
他批評泛民在《草案》上耍的招式來來去去都是「推拉閃抽」，「有責任就推，有布就無理咁拉，點人數就閃，政治議題有水就抽」，「其實泛民你唔使諗呢4招，不如閃閃縮縮就得啦！」
蘇錦樑再度拿起書本，指要套用故事的電影版中，角色殷素素臨終叮囑張無忌的一句對白，手指指說：「認住呢一班人，一個一個咁認住，一定要記得就係呢班嘅罪魁禍首，扼殺咗香港嘅經濟，同創意產業發展嘅空間！」
