咩叫實戰

上回提過，「實戰」，好多人形容為「爛仔交」。「爛仔交」唔講章法，講求膽量，出手要快要狠，呢啲都係同「實戰」相似的地方，但又不盡相同。因為首先觸發「實戰」的因由有好多種，本人唔想見到，習武者以測試自己所學為由而到處生事，撩事鬥非。另外「爛仔交」係某些人心目中係單打獨鬥，但事實並非如此，當有人搵你麻煩嘅時候，你要應付嘅數量又何止一個呢？

我認為當生命受到威脅，不但不能逃跑亦不能以金錢解決，不得不將對手擊倒嘅時候，才有必要進入「實戰」嘅狀態。事實上一生人，碰到呢種事嘅人少之有少，除非你經常身處於治安非常惡劣嘅地方，又或者你係黑道中人，仇家又多如繁星。當確定屬於以上情況嘅時候，就必須把心一橫，做好以命相搏嘅心理準備。

「實戰」 RULE NO 1，係毫無規則可言。無話邊度係禁擊部位，無話唔比用武器。為咗令對手於極短時間內喪失活動或攻擊能力，事實上越陰濕越嗱喳嘅手段就最好。只因保護自己生命最為優先。呢個時候不但不能「婦仁之仁」，更不要被思想所限﹔不要以為刀槍劍棍才算係武器，身上好多物件，簡單到鎖匙，手提電話，男士嘅皮帶，女士嘅高跟鞋，身上嘅碎銀等對實戰而言都係相當有利。於當時環境，有咩認為係有利作戰，都可以拎唻用; 例如係草叢楋揸沙，灑向對方雙眼，令對方短暫失去視覺能力，並立即以脛骨踢對方下體，這些都係唔錯嘅作戰策略。而RULE NO 2 同 RULE NO 1 一樣，「實戰」係毫無規則可言，因為呢樣野係最為重要。

RULE NO 3 「實戰」期間不能有任何思想束縛，尤其係學過功夫嘅人，唔好去唸任何學過嘅功夫招式，一唸就慢咗，你已經身中多拳。唔好唸住係開打前，擺個格鬥姿勢會幫到你，反而會弄巧反拙。因為對方會認為你「食過夜粥」，更加會全力以付，絕不輕敵。武術本身係用來運用，並唔係擺設，到咗「實戰」嘅時候，根本無時間比你去唸，係用「降龍十八掌」定係「黯然銷魂掌」，所有攻擊和防守均來自於你嘅本能動作。若果你識得用「化骨綿掌」，對敵時自然會用出來，根本就唔需要多加思考，就好似你平時行路跑步一樣自然，發自本能，先至係屬於你嘅功夫。

以上三項原則我認為係最重要，其次「實戰」中，你唔可以怕痛，要將流血痛楚視作等閒，就算俾人打甩咗隻牙，要連血都要吞埋落肚，先算係真漢子。另外出手要夠狼夠狠，招招打要害，絕不可心軟，才能有機會脫離危險，因為對施襲者留情，等於對自己殘忍。最後若然要報警，都要等你將對手擊倒或五花大綁之後，才面向著施襲者報警，否則稍一大意，對方一恢復活動能力，又會從後施襲。

雖然這些並不是一般人所鍾意聽嘅，但事實往往就係如此殘酷，我唔想寫美麗謊言，話比你聽，一遇到危險，一報警，兩秒內就會有人救你，陷大家於萬劫不復。處於非常環境便要用非常手段，希望能給予大家一服「苦口良葯」。