【滋潤湯水】三棗茶：補氣血，不燥火，大人小朋友都啱飲！

天氣凍凍地嘅時候，又令我諗起要煲返啲可以暖身得嚟，又可以補身嘅野，當然第一時間就諗起紅棗茶啦！

正當我去藥材店買材料時，店員就介紹左我煲另一款茶，仲話好啱小朋友飲。

一聽到啱小朋友就即刻諗都唔洗諗，買齊材料煲依個三棗茶，同小小豬一齊補補佢啦~

紅棗茶相信好多女士都一定成日煲嚟飲，因為可以補氣血，飲完仲唔係面色紅潤我鍾意...…哈哈！

原來將紅棗、南棗同埋蜜棗一齊煲，除了對補氣血更有效用之外，因為棗類都有抗過敏作用，所以對氣管敏感而引致容易咳嗽的症狀都會有調理作用。

補益得來不會太燥火，所以好啱小朋友飲用。

材料超簡單，只需要：

紅棗　6粒、

南棗　2粒、

蜜棗　1粒

做法：

1 將紅棗及南棗去核之後切絲，蜜棗就切開數片

2 將全部材料連3碗水放入煲內

3 待煲滾後，然後改用慢火煲大約30分鐘

話咁快就飲得啦~

由於棗類本身都有甜味，所以完全唔洗再加糖都夠甜了。

不過...…小小豬一見到杯烏卒卒嘅飲品，佢都已經十萬個不願意，最後好慘情地先飲左一杯。

其實又唔係難飲呀，比平日嘅紅棗茶仲更加甜添，一晚飲兩杯真係成晚都覺得暖笠笠，都幾好呀。可能只係小小豬嘅心理障礙影響，飲多幾次就習慣啦……哈哈！

依款茶對補血養顏都好有功效，所以除左整俾小朋友飲之外，我地大人都一樣要飲多啲。

有時候如果唔太方便煲嘅時候，可以將啲材料放入真空壼內沖泡飲用，咁就幾時都可以補下身體，好好愛錫自己呀！