【尖沙咀】一個地方，食齊粥粉麵、小菜、點心！

約左班娃娃控嘅好姊妹嚟圓方影聖誕佈置，影完相就當然要去醫肚，突然又好想食熱辣辣嘅嘢，所以最後我地就嚟左正斗食既簡單但又好豐富嘅晚餐啦。

嚟得正斗就當然係食佢地嘅招牌菜—鮮蝦雲吞麵。

可能啲麵條係用傳統竹昇麵方法打出嚟，所以食落去特別爽脆彈牙。而雲吞就面皮薄，但入面又有好足料嘅彈牙蝦肉，一啖一粒，再加埋完全冇梘水味嘅湯，真係幾好食呀！

乾炒牛河。

由於我唔食牛，所以味道我就唔太知道，我眼睇都就炒得好有色澤，基本上每條都沾到醬汁，而又唔會痴住晒，不過睇姊妹們食得好滋味，都一定係好食啦！

鮑魚雞三絲粥。

其實我平時都真係唔多鐘意食粥，不過今次就破例了，我都食左兩碗仔添。因為個粥底綿滑，而且入面又真係勁豐富嘅材料，好多鮑魚絲和雞絲呀！

食粥又點少得佢嘅好朋友炸兩呢~

依家坊間好味嘅炸兩真係買少見少，依碟炸兩都可以話我食左大半碟(真係唔好意思食咁多)，因為真係勁...…勁…...勁好食，滑嘟嘟嘅腸粉包著脆卜卜嘅油炸鬼，仲要熱辣辣咁食，真係強烈推介呀！

薑汁炒芥蘭。

超濃嘅薑汁，基本上可以話每條菜都有薑汁味，加埋好爽口嘅芥蘭，真係超啱我地一班女士們呀！

正斗香妃雞。

雞肉都好嫩滑而且唔肥膩膩得嚟又好入味，所以就連薑蓉都唔洗加都一樣好好食。

仲有流汁叉燒包。

即叫即蒸關係，送到嚟都仲係冒住煙，剝開入面嘅叉燒都係大大粒，仲有少少汁係度，真係好味呀~

杞子桂花糕。

依個真係可以用彈彈下嚟形容，因為真係好彈牙，而且入面除左有杞子及桂花係入面之外，仲有啲雪耳片，清甜滋潤得嚟又有唔同口感，所以都推介。

開開心心又過左一個晚上，同班姊妹不停吹吹水又哈哈笑，都真係幾輕鬆，所以真係多啲約佢地出嚟食下飯，充下電，等FTM都可以有自己輕鬆一面呀！