【復古定老套？】十年後的「粒粒雪糕」

話說上星期帶SY到兆萬睇玩具， 經過地面的粒粒雪糕店， SY古古惑惑的問我:「咦？一粒粒嘅？真係雪糕嚟架？」

沒有神一樣的雪糕， 只有豬一樣的老仁， 我望著舖面前張貼的雜誌宣傳...…「粒粒雪糕絶跡咗10年咩？ 點解我真係從來食都未食過。」

店員阿Ken解釋:「我哋新開咗一個月， 你可以試吓香蕉朱古力、棉花糖、黑白朱古力、及冰極彩虹， 4種味最多人買就係朱古力囉」

(阿囝一見到朱古力就已經兩眼發光)

既然未食過， 此刻我又以為是「新嘢」， 於是便跟SY研究買$35一種口味， 不如買$45食二種口味， 好似抵少少...…(SY大力點頭)

(點解我哋係用膠帽當杯， 人哋用紙杯嘅？)

阿Ken:「你揀兩種口味就係膠杯， 同埋你下次攞返頂帽杯返嚟， 可以平$3， 支持環保」

($3...…真係留畀客人嘅少少心意， 少得都幾緊要啫)

我見傳媒大大個標題「返嚟啦！」， 還以為正嘢...…

不過冰極彩虹很沙冰， 不是我杯茶...…

(SY:係呀！不過都好食， 爸爸你食我啲朱古力， 仲好食)

朱古力也只是正常雪糕吧。

之後我跟同事說， 「粒粒雪糕返咗嚟， 你有冇食過？」， 同事:「吓？ Out唔Out啲呀？ (我：以前都未食過喎！) 屯門不嬲有， 十幾年有消失過咩？ 以前係撳販賣機， 依家係人手幫你添， 咪又係一樣」

另一位年輕同事搭咀:「我以前讀小學時好Hit， 當年好似15蚊...…(我情願去食Häagen-Dazs？) 貪佢得意囉， 一粒粒雪糕未見過呀！ 但係上年美食節， 一田都有預先包裝粒粒雪糕賣啦...…你唔係當新嘢食呀？」

從前有食過粒粒雪糕， 就勉強說集體回憶， 今次一嫩一老， 以為食到寶，  其實沒有最老套， 只有更老套.

PS: 阿Ken的服務態度非常好。抵讚！