純澄SM：一蚊變兩蚊？鍊金術咩！

SM（社交媒體）廣告由不被人認同，到被人神化，過程還真相當神化，去年才聽各路大哥大姐稱「玩SM冇出色冇作為！」，年尾未到已經一幫人大迷信，對SM廣告期望簡直去到魔幻經典既水平。

有人知道臉書有多產品廣告，即係一個廣告內可以包含多款產品同進行導購，就來查詢，「臉書咁勁，你地又咁熟，照計我落一蚊廣告，番兩三蚊生意應該唔難呀？」

OK，Well，由臉面無人用，到臉書咁勁前後不過半年，生意人真係可以好靈活，由浪費金錢到番幾倍無難度，生意人又真係可以好樂觀。

廣告既嘢，十倍奉還無話唔可能，不過無保証，有保証的話，果種應該唔係叫廣告，叫鍊金術，我一定做到的話，個職位名應該叫鍊金術師，又其實，識鍊金術都未必掂，有睇《鋼之鍊金術師》就知咩叫等價交換，我幫到你一蚊變兩蚊，係咪應該俾番一蚊我開飯呢？又如果我真係保証可以一蚊變三蚊，邊會咁得閒係度打文，一早去咗加勒比海渡假啦！

人人講起SM廣告都話做Viral Marketing(病毒營銷)，希望口碑可以好似病毒咁擴散，刀仔鋸大樹，講就諸葛亮，想Viral 就 Viral？ 邊有咁容易！社媒有大能，但唔係萬能，有容易成功的方法，但我暫時未知有必勝既方法，做社媒廣告想有好效果？都係果句，先用心做好內容先啦！