誰解決我這問題，我就幫襯他

我記得以前讀中學時，誤交好友，無端端有書唔好好讀，有飯唔好好食，竟然走去扮型咁走去食煙，魚有魚味，煙有煙味，嫌萬寶路感覺好地盤，純沙龍是當年首選，白底綠字，sell 清新，至於是不是好煙味，傷唔傷身，從不是我輩考慮之列。

一包煙仔十幾蚊，何來揾錢買？看看自己銀包，零用錢有限，又要食飯又要搭車，又要篤波又要打機，負擔唔細。但之前我說過創業做生意是一個解決別人問題的遊戲，企業總裁或士多老闆都幹著這樣的活，這個範疇幹不好，就如黃子華所說一樣，「做人冇公關，屎都冇得食！」

記得當年如果在學校被發現藏有一包煙仔，其實罪名真的和藏有一包白粉沒有分別的，所以就算你有budget 買包煙，但你也譬死不想襲貨。誰解決我這問題，我就幫襯他，句號。識做生意的士多老闆，見到這個市場，就為我們provide 散賣服務，傳統的煙仔是一包一包買，士多老闆就一枝一枝賣，記憶所及這服務大受歡迎。

如果這叫做雙贏，他是雙贏的。原因很簡單，他逐枝賣毛利高，去貨快。我就易計數，冇手尾（當然你不能太蠢地攪到成身煙味咁返學），所以當年你覺得老闆是來幫你不是害你。我問題解決，他有生意做，大家開心。那時開始覺得， 資源共享的生意有得做，而隨著科技進步，社交平台的興起，令我覺得這門生意更有得做。

至於點解做？做甚麼？和怎樣做？

待續