武術≠實戰

唔少人以為自己學咗一兩年功夫，就會好好打，可以一個打十個，講真個句「拍戲就有」。就算比你學咗十年八年，若果仍然睇唔清「武術」與「實戰」之間嘅分別，只會落得一敗塗地嘅境況，亦即所謂「盲拳打死老師傅」。

我個人認為，現今沒有一種武術，完完全全等於實戰，包括空手道、抬拳道、泰拳以至詠春。鑑於武術嘅發展，為咗普及化，都發展成為運動，好多厲害嘅招式都因而失傳。於比賽場上，如果要贏，必須要知道禁擊部位及得分部位。因為蓄意攻擊對手禁擊部位，不但會受到裁判警告，嚴重更會被取消比賽資格。這就是運動，就是體育精神，呢啲比賽規則，就係為了比賽得以公平及公正地進行，並且有效保護運動員免受嚴重傷害。為咗讓自己嘅學員贏得比賽，所有教練都會針對容易得分的動作，來集中訓練，好讓學員能於有限時間內，得到最佳嘅訓練成效。所以就算比你贏到個比賽冠軍，只可算係一個出色嘅運動員。

另外學武術，講求「武德」，同師兄弟切磋要點到即止，不可以下狠招，一招一式要求有規有矩，不能毫無章法，係學武一個必經階段。因為每逢學一樣事物，必須有其形態，以便學習者有跡可尋，但「實戰」，好多人形容為「爛仔交」。但我認為不完全正確，「爛仔交」唔講章法，講求膽量，出手要快要狠，呢啲都係同「實戰」相似的地方，但又不是完全等同。

下回我地再分解「咩叫實戰」。