【新開張食$100送$100】平民定食~ $48湯飯任裝

Mikiki地庫， 一個被喻為死場Food Corner， 今晚竟然出現一條纡回曲折的長長人龍...我也排了70分鐘才可以入坐。

因為爭鮮開日系快餐店， 8款定食草根價一律$48...(E個直情係12年前沙士價錢啦， 你話點會無人幫襯吖)

快餐店當然要先買票， 付款後就開始計時， 牆上大大隻字表示， 15分鐘未送餐「免費」。 (其實， 我已經盤算...點樣可以令佢16分鐘先送餐嚟呢？？ 但諗唔到...)

付款後， 店員送來兩張$50現金券並說:「新張期內食滿$100， 就回贈2張$50 Coupon畀你下次用」(哎呀！我哋點咗$180...早知叫多廿蚊啦)

新開張...送餐過程非常混亂， 女待應連續送錯兩份定食過來...第三次更有趣...她望著我們空空的枱問:「請問你哋份天婦羅嚟咗未？」(我望住佢笑一笑...其實張枱一眼睇晒無嘢喎...仲問？)

老實說， $48真的超值， 主菜份量足料到爆， 而且還有麵豉湯， 枝豆， 蒸蛋， 及Tiramisu， 雖然排頭有點似飛機餐， 但絕無欺場。

白飯及麵豉湯更加可以自助形式任添任飲。

今晚我只添了半碗湯， 但因為我份豬扒實在抵食， 我連自己碗飯也吃不完， 所以根本毋須添飯也飽到上心口。

真的沒有騙人...芝士豬扒， 芝士真的可以拉足8吋長㗎...(就連阿囝也看到O咀呀)

阿太食的炸蝦天婦羅， 三隻蝦也長過我部Note， 阿太說:「咁鬼大隻蝦， 仲要畀三隻我， 真係飽得緊要...不過啲脆漿厚咗啲啦」(結果佢凌晨一路打TsumTsum， 一路依然不停話飽...)

其實阿太本來想點刺身定食， 但遭我反對...「你叫刺身， 我驚佢又係畀返爭鮮貨色你， 咁就唔抵啦」

全家得我一人喜愛食枝豆， 點解如此有趣的食物， 一老一嫩一粒也看不上眼呢？？ (仲好， 我今晚一人啪晒佢哋， 不知幾爽吖)

餐廳條例， 凡高於1米的， 都一定要點一個套餐， 對於細食的一家三口， 確實有點浪費食物。

全晚SY讚得最緊要的就是那件的的式式的Tiramisu， 雖然Size有點細， 但總好過送粒全無誠意的雪糕糯米糍啦！

PS: 新開張食$100回贈$100的宣傳， 只去到23日(星期日)...記得著數要快手啦！

地址 / 新蒲崗太子道東

營業時間 / 11am-10pm