勿再依賴科技維繫朋友之間嘅友誼

「科技」

今時今日嘅社會，科技發達，人與人嘅溝通再唔係好似以前咁，而家連打個電話都懶，係咁意發個短訊俾朋友就搞掂！亦都係因為咁，大家基本上無時無刻都可以搵到對方。甚至因為可以知道對方有冇睇到訊息，而引起不必要嘅誤會。但係當然因為科技嘅發達而令到我哋係網絡上面可以搵返一啲失去咗聯絡好耐嘅朋友，有啲甚至係童年知己。所以真係唔知係好事定壞事！

「懷念」

老實講，雖然話自己係靠科技嚟搵兩餐晏仔，但係我真係有啲懷念以前嘅生活！以前大家要打電話俾對方約出嚟行街，睇戲，食飯。而約好咗就好少最後一分鐘先走嚟放飛機。但係最重要嘅係，朋友約出嚟，面對面傾下偈，飲下嘢，吹下水，真係同而家好唔同！而家返工就好似無時無刻都喺度做緊嘢，因為無論老闆，同事甚至客戶都可以無時無刻咁發短訊俾你。所以就算放假，其實你都係返緊工！

「距離」

某程度上科技其實無拉近人與人之間嘅距離，反而慢慢將人嘅距離越拉越遠！就算約朋友出嚟，真係越嚟越難約。真係擇日不如撞日，分分鐘仲可以飲返杯嘢，食返個飯。雖然大部份嘅朋友都各散東西，係地球嘅唔同地方，有時真係要靠科技嚟維繫。不過如果有機會我就梗係情願約出嚟食飯飲嘢啦。始終科技係取代唔到人與人之間面對面嗰種感覺。所以唔好再依賴科技來維繫朋友之間嘅友誼啦！