今時今日,咁嘅wedding planning唔夠 wor!

早幾日,報紙出左一篇報導,講有一對新人幫襯左wedding planning 公司去幫佢地搞婚禮,因為新郎係水上人,所以佢地選擇訂一架遊艇,邀請一班親戚朋友係船上參加佢地嘅結婚派對。

一對新人總共用左$43,000﹙包括$15,000食物費﹚,諗住可以輕輕鬆鬆,將派對嘅安排交哂比wedding planner,自己可以好開心咁enjoy。可惜嘅係,wedding planner完全交唔到貨,$15,000只係食到三文治同炒飯、彩色橫額同扭波公仔變左幾個氣球、電視機故障直播唔到march-in……搞到一對新人要報警追討賠償。

近幾年好多新人為左要自己嘅婚禮與別不同,都會想搞搞新意思,等大家都記得佢地結婚時係幾咁浪漫、幾咁刻骨銘心。不過,好多時就係依種虛榮心,夾硬要做「高難度動作」,最後出現失誤,自己唔開心之餘仲令到親戚朋友失望。

例如報導講果對新人係遊艇搞婚禮,其實有好多額外嘅地方要特別留意:

普通遊艇一般載客量唔算多,所以你要大宴親朋就唔適合啦。遊艇到底可以包到幾多個鐘?幾多點俾你上船?航線係點,會唔會超時?超時又點計?會唔會有親戚朋友暈船浪?一陣上到船又痾又嘔,仲要係中途無得泊岸,到時想有氣氛都難。食物都通常都係自助餐到會,但係熱野、雪糕或者香檳又點算呢?預訂熱櫃、雪箱等就一定要啦。同埋,杯杯碟碟亦都要另外訂(真係逐隻同你計錢);仲要唔好唔記得,叫定親戚朋友唔好換碟,又或者自己預多少少,因為一定洗唔切碟。講就講到好似可以影埋海景好靚,但係其實遊艇入面位置好窄,加上無乜地方可以佈置,所以要影到好grand,甚至乎只係想影到有少少空間感,都幾乎無可能!

要繼續講真係有排都未講完,所以有時新人要另外俾錢人搞婚禮統籌都無可厚非。

不過,間唔中都會聽到因為某公司/人士唔夠專業,而被新人投訴,加上近幾年愈黎愈多人入行,個別質素比以前會較為參差。要搵到一個又有heart又professional嘅 wedding planner,真係談何容易?有機會再同大家講下點樣揀wedding planner。


 今時今日,咁嘅wedding planning唔夠wor!

 https://www.facebook.com/oika.hk