【型英帥Cafe】沙煲兄弟秘製卡邦尼　好味

阿太推介「不如去登打士街Cafe大廈食卡邦尼腸粉，好似好正咁！」Cafe 名字很中國風，「龍華軒」是不是有穿旗袍的侍應出來迎接的呢？

一走出電梯，走廊上放了一個如大鑼鼓般，疑似Monchhichi的公仔頭，嘩！！正喎...包得好好的，是否鎮店之寶？？ 

老闆:「哦！朋友出完Event唔要，我哋米攞嚟當凳坐囉」(吓？我正想問你公仔個身係邊添)

這間17樓Cafe，由兩位相識超過13年的屋邨仔所經營，其實一點中國風也沒有，只有很在地，很Raw的感覺

大大隻的老闆叫阿龍，(靚仔到不得了)，又潮又型的叫阿華，年半前自立門戶，改名「龍華軒」

原來，卡邦尼腸粉已經是去年的名物，阿華說:「腸粉擺得唔耐，質感變得好快，上年啲人為打卡而食，之後都好少人叫，E家通常一日都只會返2-3份，下午茶賣晒就算囉」(即係無得食？？失望到爆)

阿龍直言「煮咗咁多年」，最有自信就是煮卡邦尼意粉，「包你唔會失望，信我！！」，無錯，半個月後重溫相片，一樣覺得碟龍華秘製卡邦尼超好食...

最最最神來之筆，就是其他店舖沒有的~生生地蛋汁醬。阿龍說:「我嫌卡邦尼意粉啲汁比較杰，所以加入蛋醬，咁你食落就無咁杰，入口更加滑」(簡直如同Louis街頭變魔術一樣，Magic！！)

蜜糖雞翼是花名叫「求其」的阿華推介的，「甜甜地，小朋友一定鍾意」。 (大仁都鍾意呀！ 好好食又入味， 絶不求其啦！) 

阿龍阿華沉迷舊物。牆上有一幅周星馳的砌圖就是其中一件當年物，阿龍:「好耐之前咪興明星砌圖嘅！！ 就係嗰時儲落囉」(我以為你哋係星爺迷，買來供奉添！)

食一餐飯竟然可以一口氣認識兩位老闆過去的嗜好，一堆相機中，見証阿龍曾經迷戀Canon at1，而阿華則是那雙鏡海鷗的主人，阿龍:「部海鷗咁難用，得阿華先識影」(係呀！！對焦對得到，要影嘅嘢都走晒啦) 

阿龍話:「其實我哋都唔想咁多人介紹E度，好似上年飲食男女話我哋係龍兄虎弟之後，多人多到不得了，啲客想坐耐D都唔得，其實我最想大家食得舒服，同開心啫」(咁我今次...真係矛盾喇！)

「龍華軒」的誕生原來是有一段故事，5年前阿龍由澳洲柏斯working holiday回港，一心想開Cafe，但又沒有經驗，當時阿華則在旺角一樓上Cafe任廚，老友鬼鬼， 於是就叫龍去幫手

阿龍回憶當年柏斯的日子:「悶到死，不過儲錢就最啱，而且我嗰時做酒吧，要學埋沖咖啡，所以都算對我哋開E度有幫助嘅 」(咁我諗你在柏斯嘅兩年實儲到好多錢，嗰度靜個鬼嘅！)

二人在Cafe打工期間，發現就算如何努力，錢亦只是老闆賺，於是就激起龍，華兩人創業大計。終於年半前兩人「做回自己」的夢想達成，不用再被老闆罵。

誰知一年前，本來兩老死一向無所不談，但日對夜對，漸漸以為「你見到嗰D嘢咪又係我見到嗰D」，所以便發展至毫無交流。

突然阿龍一個誤會，於是聽到華一句：「你咁戇居！」，二人心病日久，對罵一觸即爆... 差點「龍華軒」亦就此結業。

「之後我哋咪係屋企樓下傾通宵， 傾傾傾...傾到天光咁咪無事囉，原來男人都唔可以話心照就得，話晒識咗十幾年，E家乜都傾」阿龍輕描淡寫似在說朋友故事一樣

兩位多材多藝的老闆，正計劃於樓上或樓下開分店，但經上次險些喪業一役，他們決定即使開分店，亦不會一人煮一間，一定會一齊做，因為這裡叫「龍華軒」 (PS: 阿龍點解你真係咁鬼大隻嘅呢？定係我個肚腩太大 ？？)