創業講呢D之有苦自己知員工篇上集

回想起啱啱創業嘅時候，好在搵左個拍檔，先不至於向十幾年間要孤身上路，起碼食飯唔使一個人，有咩E郁有兩個人一齊撐住。响十幾年前，邊有咁多人出黎創業，邊有咁多創業團體，政府邊樹有咁多支援丫，下下自己打真軍，都幾辛苦家。身邊幾乎全數嘅朋友同同學都係打工嘅，大家有住唔同嘅體會同感受，簡單嘅例子就係：打工仔好想打8號風球，但係做老細嘅就永遠都唔想打風，咁你就會知大家嘅想法有幾唔同。所以遇到咩事都好難搵人傾，自己硬食，好多時都係靠撞板黎學野。一日做十幾個鐘係一種辛苦，坐足一日冇野做又係另一種辛苦，有邊個知？

剛創業時朋友間出黎吹水飲野，都會申下公司E樣果樣，老細又點衰點衰，當然我有好一部份唔係咁認同啦，但出得黎又真係冇計就只能夠坐埋一邊齋聽唔吹。朋友成日都問，我公司有呢D果D，D上司咁樣咁樣，你公司會唔會咁家？我心諗，大哥，你打工果間公司係上市公司，我果間就係唔知幾時會執笠嘅豆腐潤公司，我真係好多謝你嘅問題。記得有一次，竟然有人問我，你係咪好似我老細咁衰，係嘅話我唔同你做Friend，我當堂打左個突，唔知點回應佢。我嘅失措唔係因為我覺得自己衰，而係大家做左咁耐Friend佢竟然講D咁嘅野，堅冇癮。

老實，我都打過工，我都比老細欺壓過，所以創業時我同自己講我唔會做一個衰老細，比我再重申一次，我唔會做一個衰老細。但係向我做左老細之後，先發現原來向呢個年代老細愈黎愈難做（尤其係做細公司嘅老細），市場對老細嘅要求不斷上升，反而同對員工嘅要求係一直咁下降緊，但佢地需要照顧嘅程度卻又不斷增加。以前老細話要企，邊個夠胆坐；以前老細未收工，邊個夠薑走先？我記得好幾年前請人，就黎IN完果時，你問個Applicant重有冇咩工作上嘅問題想問？好多Applicant會問，你公司係咪五天工作家？有幾多日Annual？重有咩其他福利？留意，我講到明係比你問工作上嘅問題丫麻，福利果Part都未到，重好似請硬你咁，而且廣告寫明五天半嘅，你班友有冇睇家，一於Foul，好有毅力咁IN到覺得佢態度正確為止。而家?你廣告上冇寫係五天工作嘅話，真係想搵個人黎IN下都難，即使有一兩個有心人，IN完當你打比佢想同佢講請佢果時，佢竟然講，我IN左幾份工等緊REPLY，你下星期CALL我睇下我搵到野做未先啦！嘩！邊個先係老細呀？我都係請個文員者，又唔係請CEO，唔使扮孔明要我三顧草盧掛。你話打工辛苦，家下做老細，重辛苦呀。有苦，有幾多人知丫。

原圖:http://wenwen.sogou.com/p/20090912/20090912191202-1804983722.jpg