【復仇者聯盟2】今次真係發達啦@ 7-11

何謂:「開心到彈起！！」SY學校假期最後的今天，他和我就徹底興奮到不停大叫:「嘩！！ 嘩！！嘩！！ 好勁呀！！ 好靚呀！！」

首先要多謝7-Eleven PR姐姐的厚愛，為SY送上超級無敵的復活節禮物，其實連我自己也驚喜到難以至信…我的復仇者聯盟2套裝呀！ (今次真係發達啦！！)

復仇者聯盟絶對是我最愛的外國英雄電影，一次過十多個英雄齊齊出場，簡直就等同幪面超人們大戰戰隊一樣，大堆頭大陣仗，第一集我亦煲到滾瓜爛熟的境界

SY只看過IronMan，他問:「點解有個肥嘅IronMan？好人定壞人嚟架？」我答他是給IronMan坐在入面控制的，用來對付變形俠醫的

SY:「吓？ 爸爸…你又話鍾意綠色E個人？壞人你都鍾意？」小朋友十分緊張，只愛正義朋友，從前我買了一套「嘰嘰」衫給他，當他2歲時，未知「嘰嘰」為何物時， 也肯穿著，及後一發現「嘰嘰」是壞人，他幾乎想剪爛件衫

我解釋:「變形俠醫有時會失控發狂，所以IronMan就駕駛HulkBuster機械人對付佢，之後佢一定會變返好人嘅，你放心啦！！ (你唔好呃我喎！！) 到時一齊睇套戲咪知囉…」(鬼咁期待兩隻大嘢打到七彩的畫面呀！)

SY:「咁十個， 邊個係壞人呀？ (銀色嘅奧創囉) 我都估係，好醜樣呀佢…姐姐係唔係好人？ (係呀！！ 佢係變形俠醫個女朋友)」好驚奇的阿囝:「真係架？？」(我都未睇套戲， 點知呀？？？)

「復仇者聯盟」我鍾意，所以覺得這套公仔，絶對近年，7-11換公仔中最最最正的一套，前幾日，我見7-11上陳列架時，我望足5分鐘，店員仲同我講:「好靚呵， (係呀！)聽日先開始換喎…」(我知，所以咪企定定望住先囉…)

之後換得太多女性向公仔，印象中純男性系列應該是第一次，雖然很多女網友也表明對今次公仔不感興趣，但我和囝則非常着迷，因為太多偶像喇…

每個公仔脫下地台，背面有一個磁石功能， 阿囝發現後，「瘦嘅就得啫，機械人同綠色人咁大隻點得呀？？」磁石很強…全部經過測試，阿囝:「原來真係10隻都黐得到呀！！」(仲好實添！！)

不過，奇怪為何今次首日並沒有基地換購呢？前日星期三，我還專登走去問了數間7-11，答案當然統一標準:「無喎，今次無見過有基地換呀」

(我就無所謂， 因為今次份復活節禮物有大盒， 正正就可以畀我當基地啦！！)