港漫係全盛時期，大家攞定錢巡報攤等書返，當年中華英雄神話雙週刊賣廿幾萬本，龍虎門幾甘食老本都週刊十五萬本，咪話唔勁！但唔知從幾時開始，讀者買／睇漫畫既習慣或者所謂既銷費模式，不斷地改變。
最初，有部份報攤睇中回書唔扣錢呢招，推出換書淨賺既經營手法，唔明？賣本天下$14（$14既50%易計啲），睇完之後攞返去當半價$7，補多$7買本武神，睇完又攞返去當$7，再補$7買本龍虎門...，最後嗰本攞埋返去找返$7，整個過程，假設該讀者每週買十本，結果用$70睇咗$140既週刊，但手上一本漫畫存貨都無，而報攤最終將所有書退回發行，零代價就賺咗$70，而出版就一毫都賺唔到，仲要找印刷，發行，人工...筆數；其後又有所謂租書，不過對簿裝週刊影響不大，那些單行本，日漫先最受害，幾蚊租幾日，一本幾個人睇，得益最大既係租書店，只需買一本就可循環租借。
但數到最重創港漫既，無可否認，網上看盜版漫畫肯定係元凶。溫日良在他的作品“絕地轉生“中，描述摧毀世界的一種力量，叫做“燃祂力“，他想說的，正是慢慢地蠶食港漫發展的Internet。基本上，每一本港漫都幾乎可以係網上搵到，有啲離譜到，中午出書，黃昏已全書上載...！漸漸地，當智能手機和平板電腦普及，數據上網已成通話月費基本配套，免費Wifi通街都係既時候，成千上萬既漫畫就好像存放係叮噹既八寶袋一樣，隨時攞出來睇，久而久之，讀者人數愈來愈多，對漫畫質素既討論愈來愈烈，對網站畫質和更新速度要求愈來愈高，但同時，肯真金白銀購買的讀者愈來愈少，港漫銷量愈來愈低，據說現時平書數幾千就得，鐵將縱橫這類較受歡迎的作品，或許也不夠兩萬。“港漫質素愈來愈屎，邊值$15／$17？“，這類說話很多時都是網絡漫畫支持者自我感覺良好的說話而已。
睇開網絡漫畫既，無理由唔識布卡漫畫呢個App，但最近出現大規模漫畫下架潮,大量人氣漫畫如「死神」、「TOLOVE」、「食戟之靈」等全數下，網民齊聲疾呼之際，發現原來布卡這次的下架潮原來與騰訊有關，表示由騰訊買了版權的漫畫沒一本能看，大量港漫台漫也沒有了。網民同時推測「布卡漫畫」的大規模下架潮與日本內容產品代理製作公司「創河集團(CREEK&RIVER)」為小米的智能手機提供日本的漫畫作品有關。根據《日本經濟新聞》11月5日的報導，預計小米最早將在明年年初供貨的智能手機上安裝自帶漫畫作品的閱讀軟件，據稱正在與多家日本出版社進行選定和交涉。布卡漫畫在官方微博發布宣告，暗示該企業遭遇“變故”。該軟件中原本免費閱讀的漫畫已經在布卡中下架，比如《海賊王》標記為“內容來自騰訊”，即使在布卡漫畫APP中也需要打開網頁閱讀。
從來版權在內地都有自己的一套演繹方法，無論電影，電視劇或漫畫，唔會理既時候就百花齊放，遇到一啲國際經貿會議就突然打擊，又或選擇性地打擊，有網民表示是次打擊侵權漫畫，與「小米」、「騰訊」等與內地政府關係較好的企業擁有漫畫作品版權不無關係。不談政治，但若內地能積極面對漫畫侵權問題，或許能有助港漫出版者對拒“燃祂力“的蠶食，重燃一線生機。
