上網睇漫畫可能係近10年港漫出版人最討厭既“發明“，直接地摧毀港漫既生態；但若論版權，港漫係70、80年代未上軌道時，出版人本身亦唔關注版權的問題，出版上直接翻印未授權既日本漫畫通街都係，代表作：海豹叢書，創作上很多時亦未獲原著正式授權，代表創作人：黃玉郎，如來神掌“龍天“年代頭十幾期還是曹達華的如來神掌，之後“龍仁““龍劍飛“年代變咗倚天屠龍記，“龍九洲“年代就變咗絕代雙嬌，醉拳初期又明抄“射雕英雄傳，個個上晒岸先開始識講版權。

上面講既事可能好多師兄都知，今日想分享吓既原創抄襲事件都幾有趣，淨係呢一頁都好複雜，出自“小魔神“，但大家唔好以為作者係黃玄生（即黃玉郎），而係一個叫上官玉郎既人畫既，書入面竟然出現一個叫“鐵魔“既機械人，對白仲話“天才的設計“...，但大家又唔好以為上官玉郎抄鐵甲萬能俠，原來佢根本係由永井豪親手畫既，大家又唔好以為港日合作咁前衛，原來畫都費事，萬能俠係由原著影印剪貼落去（千真萬確，行內人已證實），所以係咪好複雜呢？