(一)消委會實測 做嘢做到崩潰?飲咖啡! 通宵要捱眼訓?飲咖啡! 行街口渴?都係飲咖啡!

飲咖啡已經成為大部分上班族生活不可或缺嘅一部份,但如果趕返工又 唔想排隊嘅話,買部咖啡機係屋企自己煲都不失為一個好選擇。今日小編就帶大家分析下市面上嘅Espresso咖啡機啦~

家用嘅智能咖啡機主要分為三種:全自動機,半自動機以及咖啡囊式機。不論功能,大細,價錢都有好大分別。

全自動機: 全自動機操作簡單,只需放入咖啡豆或咖啡粉,按摯就可以沖出一杯香濃咖啡。用戶亦可以選擇磨豆以及水嘅份量,或加入奶壺製作latte等含奶咖啡飲品。好處喺自由度較高,方便使用以及較為美觀。但一般售價較貴,約一萬多元左右。使用時亦需要注意咖啡豆會否受潮。

半自動機: 半自動機只可以放入咖啡粉,購買咖啡豆嘅用戶就需要自行磨豆先沖到咖啡。但由於用戶自行落粉,填粉及壓粉嘅關係,可以通過控制咖啡粉份量以及壓粉力度調節口味。呢類咖啡機一般比全自動機平,售價大概落喺$2000-6000左右,使用亦較方便。但咖啡粉若果保存不妥,就會產生氧化或受潮問題,用戶需要注意。

咖啡囊式機: 咖啡囊式機嘅用戶只需將咖啡囊放入機內,按摯後就可以沖出咖啡。喺味道選擇方面,生產商通常會研發不同口味嘅膠囊,部分生產商更提供25種口味供客戶選擇。加上機身售價亦比較平,約$1500左右就已經有不少選擇。但咖啡囊只可以選擇該生產商發售嘅膠囊,而且售價約需要$5一粒,長遠來說價錢較高。

喺消委會報告調查下,發現De’Longhi喺全自動以及半自動咖啡機上製造質量較高,喺省電,使用方便程度,咖啡品質等指標下都比較高分。而咖啡囊式咖啡機就由Nespresso研發嘅機種係咖啡品質,製作速度等領域較為領先。各位喺選擇咖啡機嘅時候不妨留意一下呢兩個牌子。

作為一個精明消費者除左要識得點揀咖啡機之外,仲要知道正確用法先可以確保安全同防止機身損毀!以下為大家提供一啲使用咖啡機嘅時候必須注意嘅小貼士!

 沖調前先清理咖啡噴嘴及清理管口,以防剩餘雜質影響咖啡效果  使用時需要注意出口可能噴出水蒸氣  打奶泡後切勿馬上觸摸蒸氣管  每次打完奶泡後要用熱毛巾抹乾淨蒸汽管口,以防止阻塞管道  每次使用後必須徹底清理咖啡機

(二)舊生會實測 小編訪問咗幾位裝修防伏班嘅舊生,了解佢地對於市面不同咖啡機嘅睇法!最後發現大部分舊生其實都用緊咖啡囊式咖啡機,認為操作同買膠囊都比較方便,而且多味道選擇。但亦有一位舊生認為半自動咖啡機可以自由調節咖啡粉份量,操控空間較大,對享受沖咖啡過程嘅用戶就最適合!

希望大家睇完呢篇文章,搵到合適嘅咖啡機啦!

本文章內容及圖片均由本專欄作者提供及上載,並不代表本公司立場,如有任何版權問題,請與本公司聯絡。


 消委會報告——咖啡機有平有貴 認清需求最實際 (裝修Felix)

 https://www.facebook.com/hkdecoman