皇者娛樂旗下歌手王雯 Nuna 前日為新歌《Nuna Party》拍攝MV。Nuna指這首歌聚集了所有「Nuna Style」:「有時我濛吓濛吓,做啲唔係正常人嘅嘢,例如正常歌手會喺台上跳舞,但我就匿喺枱底下面跳我個signature move 「炒餸舞」,因為個動作好似炒緊餸咁。」

33歲的Nuna指《Nuna Party》是為她度身訂造,「想同人講就算你去到呢個年紀,雖然唔係啲咩後生女,係所謂嘅中女啦,都唔介意大癲大肺去實現自己嘅夢想。」故此一向保守的她亦博老命「瞓身」演出,還以超短裙曬腿,「嗰日我唔記得著打底褲,都好怕走光㗎!」 之後更鯨吞兩大隻辣椒,搞到個嘴又紅又腫。

新歌包含廣東話、英文、還會有少少韓文,所以除了請得同門師妹Mascara 隊長李海清(JoJo)助陣外,還特地請來韓妹來拍攝,Nuna指韓妹名副其實是個學生妹:「佢依家喺香港讀緊碩士學位,咁啱朋友又介紹佢畀我識,佢又有興趣去拍,所以就邀請咗佢過嚟。」Nuna更自嘲:「佢哋會做一啲氣質呀、斯文嘅女仔,而我就想跟佢哋做,但跟極都跟唔到,真係江山易改,本性難移,個MV開頭都好正經,但最後會愈玩愈High,愈玩愈痴線!」


 王雯拍新歌《Nuna Party》MV 鯨吞辣椒跳招牌「炒餸舞」

 https://www.facebook.com/starshk