裝修佬話你知: 暖風機知多啲

天氣涼番唔少喇～屋企如果冇一部暖爐、暖風機，又點能夠長時間都暖笠笠呢 ? 而市面上亦都有唔同種類嘅暖爐、暖風機可供選擇，究竟有冇話邊一種好啲呢？一齊去文了解更多啦 !

電暖爐

呢一款係比較舊式嘅家庭電器，靠住熱力蒸發水或者油去散發熱力，令室內持久溫暖。電暖爐係一種頗為耐用嘅電器，一般都唔需要特別注重保養；但係當電暖爐運作期間就會較多噪音，而且唔小心觸摸到發熱面就有機會燙傷喇 ! 加上使用上亦需要空氣流動先可以令熱力擴散全屋，呢一點有機會令唔少用戶卻步呢 ~

陶瓷及石英管暖風機

以上兩款都係較新式嘅暖風機，石英管暖風機就係靠住電流令石英管釋出熱力，令室內變得溫暖；而一般陶瓷暖風機功能上相對比石英管暖風機多，除咗具備熱風、暖風功能，有啲仲有冷風功能，咁就一年四季都用得著喇 ! 加上安全設計，例如係翻倒斷電保護功能、過熱斷電保護功能，咁使用上就能夠令用戶更安心啦 ~
其實市面上仲有唔少暖風機種類，以上只係一個簡短介紹呢 ~ 其中有啲款式仲係有防霧水功能，帶埋入浴室使用都可以o架 ! 希望大家都能夠選擇到一部合適暖風機嚟度過呢個冬天啦～

(文：裝修華)

(以上圖片均來自網路，如有任何版權問題，請與本站聯絡)