【裝修佬話你知】家居萬能俠！神奇咖啡渣

有咩好得過每朝起身都飲一杯既香濃又熱辣辣嘅咖啡先番工呢~假如你屋企用緊即磨咖啡機嘅話，你會點樣處理每日積聚嘅咖啡渣呢?相信大部份人都會選擇將咖啡渣倒落垃圾桶喇，不過裝修佬就要話俾大家知，其實咖啡渣係有好多用途架！即刻去文啦！

去除異味

只要將原本濕潤嘅咖啡渣烘乾再放入一個細小容器，然後就可以將咖啡渣放入雪櫃、鞋櫃、洗手間等等地方，就會有除異味嘅作用，同時亦會令整個空間充滿香濃咖啡味道喇!另外亦可以喺廚房鋅盤附近擺放一碗咖啡渣，當雙手處理過味道濃烈嘅食物之後，就可以喺洗手時加入少量咖啡渣，咁樣亦有助除去食物味道架 !

疏通水管

假如廚房鋅盤、浴室洗手盤出現去水緩慢現象嘅話，都唔需要急住去買通渠水處理問題o架 ! 只要將大概50克咖啡渣倒入去水位，再加入適量清潔劑及一煲滾水倒入去水位，就可以令水管變得非常暢通架喇 !

修復木傢俬外貌

咖啡渣除咗做到除異味、清潔用途之外，仲可以修復木製傢俬嘅表面刮痕；將一茶匙咖啡渣混合一茶匙橄欖油，再用綿花捧或者化妝綿沾少量混合物塗上刮痕上，就有效將刮花表面修復好喇 ! 不過使用前先喺傢俬隱蔽位置試試效果，試過冇大問題先至好修復木製傢俬呢~

其實咖啡渣仲有大量實用用途，包括有助種植、為寵物去蝨功效，實在係一種不可多得嘅物品嚟架!下次沖完咖啡，記得要將咖啡渣儲好，有需要嘅時候就拎出嚟用喇～

(文：呀J)

(以上圖片均來自網路，如有任何版權問題，請與本站聯絡)