【轉季的煩惱】衣櫃執衫有妙計！

話咁快炎熱嘅夏天又過去喇 ! 又係時候執拾衣櫃，將冬天衣物從各個收納位置拎番出嚟喇～每到呢個時候，又係大家頭痕嘅時候……究竟有咩辦法可以令執拾衣櫃變得更輕鬆簡單呢 ? 不如睇睇裝修佬有咩建議。

首先要善用衣櫃空間，放更多衣物嘅話，淨係將衣物摺得靚靚係唔夠架！喺執拾細小衣物，例如係襪、內衣褲嘅時候，可以考慮用有分隔功能嘅貯物袋、貯物盒收納好，整齊得嚟又容易搵到想要的衣物。

另外一個做法係善用真空收納袋，只要未有需要穿著嘅衣服按類別摺疊好放入真空袋，再用吸塵機將真空袋裡面嘅空氣抽走。有效縮減原有體積高達4成，可以騰出更多衣櫃空間，擺放到更多衣物。

假如你有拎衣物去洗衣店清新嘅習慣嘅話，都唔難發現衣物清新過後，店員都會將衣物摺得整齊，仲會入埋個大膠袋添！其實只要將清潔後嘅轉季衣物連埋個膠袋，整整齊齊咁放入衣櫃，就可以慳番唔少功夫同埋時間喇！

最後想講講，其實坊間仲有執拾衣櫃方式架，以上內容只係冰山一角咋。假如大家有更有效嘅執拾衣櫃技巧，不妨話俾裝修佬知吖！

(文:裝修華)

(以上圖片均來自網路，如有任何版權問題，請與本站聯絡)