鄭欣宜(Joyce)於本月中遠飛意大利佛羅倫斯，獲邀出席由世界知名高級時裝店LuisaViaRoma主辦的第10屆FIRENZE4EVER盛會。Joyce憑着一口流利英語、樂天性格及對時尚潮流打扮的觸覺，令她在以「ORIENTAL OBSESSION」為主題的盛會上彰顯東方美，且更深受海外媒體歡迎，在著名雜誌《VOGUE》及《Elle》意大利版、《GQ》法國版和德國的《ICON》等，都有她的報道。
今次在LuisaViaRoma概念店展示的品牌超過500個，來自世界各地的潮流blogger、designer及國際媒體在造型實驗室(Style lab)合力打造最前衛的時尚大片。作為亞洲區代表之一的Joyce亦首次嘗試Style lab的四個不同造型，當中她最鐘情以Diesel黑白條紋西裝配Le Silla黑白尖頭高跟鞋、拎着Benedetta Bruzziches金色手包的女強人look。
Joyce說：「我覺得呢套衫係女強人feel，我自己好鍾意，因為嗰套衫好似係我呢段時間最想做嘅嘢，好配合我嚟緊新歌個theme──只要你有自信去做每一件事係爭好遠，大家都會感覺到。我相信如果喺一年前要着住呢套衫，我一定唔夠膽企喺條街，仲要係旅遊景點，仲要有好多遊客喺度，就咁着個bra周圍走，但係我覺得呢次好似墮入一個角色，好似一個角色扮演。」
另外一套花裙復古造型，穿上Etro真絲連身裙配Shourouk Double Zulunecklace頸飾，已打造一個不一樣的Joyce，「着住嗰條長裙，我覺得好意大利旅行、好似去放假嘅感覺，我特別鍾意亦都因為好唔同我平時着開嘅衫。若果正常我見到呢條裙掛喺度，我係唔會揀嚟着，因為好花哩花碌又開胸，但係成個感覺好配合，我哋又喺個玫瑰花園度影呢輯相，所以我最鍾意係呢兩套。」Joyce大讚四個形象都好正。而披上Marni深綠色大衣和Gianvito Rossi海藍色高跟鞋，襯Giancarlo Petriglia撞色蛇皮手袋的造型，也令Joyce增添型格。
這次短短幾天的歐洲之旅，讓Joyce大開眼界，但她最希望做到的，並不是要推廣加大碼女生又肥又靚的訊息，要推廣的反而是一種態度，「無論一個人嘅size係點，好瘦或者好肥，都有個人嘅風格，呢樣係一種態度。每一個人都有美麗嘅地方，值得我哋去發掘同埋欣賞。」
