近日不論先達定係上網，大炒定定細炒家，都大呻今次做咗大閘蟹。因為今次iPhone 6同Plus可以話係有史以來炒得最快、亦跌得最快嘅一部iPhone（唔計iPhone 5c，因為炒都無人炒）。唔少人出貨之後，個價繼續一路向西（西價，即係唔合心水），而有人就想到自己北上華強北放機，希望盡最後努力，賺到最後一水咁話。
而呢個時候，一路都靠每年兩個Apple節（iPhone及iPad）搵食嘅先達水貨佬、就話依家啲人自己以為返大陸賣機，唔經先達做中間人就可以賺到盡，但實際係做壞規矩，搞到個價一路跌落去。
水貨好定壞呢件事其實並非重點，因為今日主題而係何謂「做壞規矩」。事關呢句野由先連（或其他水貨客）講出來，假如佢地同行家講，Fine。但係點解又要將責任推係其他人身上？佢地口中所謂規矩，其實只係佢地行內，為咗保障自己而發展出來。但對家外人來講、唔好話唔知規矩，就算知道，佢地都無任何義務去遵從。最多只會係因為見到利益一致，所以先唔去打破呢個規矩。
而另一件事，就係水貨客、炒機佬都應該明白，呢門生意一路都係有風險：價位。價位隨情況不同而可昇可跌，但從來唔會只昇不跌。但自己睇唔清個市況、淨係抱著手上堆貨希望有奇跡出現。講真，想唔死都幾難…
上面講嘅，尋日都有例子你睇喇。就係大陸有人想用280萬炒機，結果一俾完50萬訂搵人幫手買機，個市就即刻炒燶。結果錢本賺就已經先無50萬，重要搞到要動刀恐嚇識員都收唔返訂金…
電視都有話：投資涉及風險，自問呢類高風險野，玩唔起就唔好咁大投資喇。
