浴室裝修小知識(二) 座廁邊隻沖水夠力D? (直沖式、虹吸式、雙旋渦式)

有人嘅地方就必定會有馬桶，馬桶係我地日常生活中使用頻率高，但又有幾多人對佢有深入嘅瞭解？識得點揀？唔知你有無呢個習慣, 去完廁所沖水嘅時候擰返轉面睇下啲水會點流？直沖式？虹吸式定雙旋渦式呢？呢幾種水流模式有咩分別？邊種會沖得更乾淨呢？ 

其實，一個馬桶嘅靈魂並唔單單只在於佢嘅外觀，同做人一樣，望唔到嘅內涵都好緊要架!只有瞭解清楚先可以買得安心，去得放心，以下裝修佬同大家分享以上幾種水流模式嘅分別，一齊去文！

Wash down (直沖式) 

直沖式座廁係香港最常見嘅款式，係利用水嘅沖力直接將排洩物沖走。簡單講同無廁所水時，大家直接倒兜水沖廁既原理差不多。裡面排污管形狀有點似「P」字型，彎曲度細而排污口徑大，所以淤塞嘅機率會相對細。 雖然直沖式沖起水來比較嘈，且會有水花濺起，但好處係設計上比較細隻，佔用空間會比較少。用水量一般只要6L左右，屬於比較省水。 

Siphonic (虹吸式)  

虹吸式座廁係大陸同台灣成日見。特點係比較長同多數地去水，因為裡面嘅排污管係「S」型，彎曲位多，所以馬桶體積相對較大。 

虹吸式馬桶係沖水時會先積少少水，填滿大部分馬桶內嘅排污管，做成壓力差而產生虹吸現象，吸走排洩物。所以耗水量較大，用到成7.5~9L。 

Double Vortex (雙旋渦式) 

Double Vortex 係新式既沖水技術，特點係利用兩個側面出水嘴取代以往小孔出水，集中水力凝成漩渦水流去沖走排洩物。雖然用水量少，大約只要4L但都有好強既沖水力！

由於水流以旋轉模式覆蓋更多馬桶兜面積，可以將排洩物沖走之餘同時洗返乾淨個兜。無左小孔都易左清潔，減少水垢積聚。 坐廁日常使用會有污垢及深色污漬附著係陶瓷表面，相信好多朋友都深有體會。唔講唔知，其實陶瓷表面都係其中一個沖得乾唔乾淨嘅關鍵元素。

好既沖水技術加上好既陶瓷物料，沖得乾淨之餘又慳水，仲可以抑制水漬積聚，令日常清潔變得更輕鬆，下一次我地詳細再講。 

其他常見問題 

問 : 馬桶點解唔識沖水？ 

答 ：開左入水閘制未架? 開左都沖唔到有可能係馬桶配件有問題，如果水質差的情況下會導致入水閥出現淤塞，入唔到水。 

問 ：馬桶點解一直流水？ 

答 ：可能係封水用既膠片鬆左、老化或者有野攝住左。一個係入水閥到，壞左會導致水箱不停入水,多餘嘅水會透過沖水閘既滿水窿，一直流入馬桶。另一個係沖水閘到，鬆左都令出水孔不停漏水出來。 

問 ：馬桶入水閥壞咗點算好？ 

答 ：咁又唔使成個馬桶換嘅~ 如果水箱有水就先排走晒D水。無論入水閥定出水閥，壞左既只需要搵師傅換返就得存喇。

(文：隨心所浴)