【家居知識】新買窗簾有甲醛？應該點處理？

新屋裝修完，都會添置啲軟裝布藝進一步裝飾室內，飄逸嘅窗簾是家居裝飾不可缺失嘅一部分，窗簾除咗可以遮陽、保護隱私，仲可以美化家居環境。啱啱買返來嘅窗簾，唔少人可都會發現窗簾上會有陣味，其實就係甲醛等揮發物。甲醛已成為破壞家居環境、損害人體健康嘅一大污染源，佢嘅存在可能引發哮喘、白血病等多種疾病。咁窗簾點解會含有甲醛呢？又應該點去除呢？裝修佬話你知。

窗簾有邊啲？ 

現時窗簾布一般都係一層，最多係帶有遮光布嘅雙層窗簾，然而完整嘅窗簾通常分三層，第一層係窗紗，為半透明；其次係透簾，主要用來調節光線；第三層係內窗簾，一般柔軟厚實，冬天用來保暖。 

窗紗 

窗紗，顧名思義，就係一層薄紗，稀疏編織及清透材質望落呈半透明狀，係夏天使用較多，佢能過濾刺眼光線及細菌，亦有唔錯嘅裝飾作用。 

透簾 

透簾比窗紗略厚，主要作用係調整室內光線，阻隔視線，亦有過濾作用。常見透簾原材料有滌棉、滌麻混紡織物，易清潔，有一定嘅防火效果。 

內窗簾

最後一層窗簾，一般以厚實、柔軟織物來製作，如棉麻、絨布、綢緞、植絨等等材質。其主要作用係保溫、遮光、隔音等。內窗簾質地雖然厚實，但卻經過抗靜電、防火等處理，用落可以放心。 

點解新買窗簾會有甲醛？

甲醛其實係一種無色無味嘅物質，點解會聞到甲醛？其實係一種刺鼻嘅感覺。咁窗簾點解會帶有甲醛？其實係同窗簾本質抗皺、硬凈有關。 大多數人揀窗簾時多注重花色、款式，對窗簾成分等並唔太在意。隨著對窗簾布要求提高，生產商會通過對窗簾布浸軋硬挺劑漿料等手法，提升窗簾嘅手感同物理性能！而呢D漿料質量嘅好壞就同窗簾中甲醛含量息息相關了，大牌子窗簾生產工藝先進，漿料原料環保，甲醛含量亦相對較低。 

窗簾如何去除甲醛？ 

甲醛溶於水，新買返來嘅窗簾可以用清水浸，如果甲醛含量多，味重，可以多用水洗幾次，然後係太陽底下曬。除此之外，仲可以用專門去除甲醛嘅產品，如甲醛清除劑、納米光觸媒等。 

(文：呀J)

(以上圖片均來自網路，如有任何版權問題，請與本站聯絡)