斷捨離的圖片搜尋結果

(網上圖片)

「放手」、「狠心」,不難明白、卻很難做、更難做得徹底。

可能大家都聽過、知道,斷絕唔需要嘅東西、捨棄多餘嘅廢物、脫離對物品嘅執著和眷戀,係可以令到自己活得快樂、簡單嘅好方法:就係興左好耐嘅「斷捨離」。但係,知而行難,講就易,做就難,係大家嘅通病。去蕪存清咁整理自己嘅人生,改變習慣,你估話咁易咩?剩係執吓間房都好多問題呢!「呢樣唔捨得」、「嗰樣第時可能有用呀」、「好貴買返嚟呀」、「宜家掉咗佢好浪費呀」嘅內心掙扎、迷思,點樣可以擊破呢?

除左物品之外,仲有心態嘅調整呢!咩叫生活雜亂無章?去LKF通頂然後第二日死狗狀態咁返工、一邊話買野減壓返到屋企又要將上幾季買落啲多餘衫一包包咁送出去、一邊怨天怨地怨身邊果個怨公司老闆怨環境怨時勢又怨在錯嘅子宮出世但又唔肯改變喎,咁其實為咩呢?幾時先可以斷左啲嘮叨呢?所以,要斷捨離嘅野,最起碼有兩樣野:physically見到嘅物品同mentally見唔到嘅心理狀況。

我對於唔同野都有令人費解嘅情意結,好難完全丟掉。例如,無咩用嘅衫同鞋。以前中學大學時代嘅一啲波衫、風褸、短褲,同好多好多皮鞋波鞋出街鞋,無爛少爛大半爛都好,都唔捨得隨便丟,因為,成日覺得當時買嘅每件衫每對鞋,都代表住當時嘅一件事一些片段一份情懷一種心情,丟左就係對唔住佢地,輕率地忘記左佢地。又例如,用筆寫字、用schedule book嘅習慣性、保存住貼紙相、信件之類,因為細細個果時,我好鍾意寫文字,小學果陣會抄歌詞、中學果陣又會有筆友或者出國留學啲friend會寫吓信交流,仲有每次出街玩都會去影吓貼紙相,都留低左唔少記憶,同宜家用B612或者snow即刻selfie嘅感覺真係唔同呀。雖然,早年搬屋已經丟左一部份,不過都仲有一啲係唔捨得丟掉嘅信同相。又例如,對曾經好friend但宜家已經少見面嘅朋友、又或者已經斷絕往來一排嘅故人,成日都有啲心癮想見吓佢地,好彩嘅仲可以見吓面飲餐茶寒暄吓比佢sell吓水機同保險基金,有誤會嘅直頭當正你死左添喲。又又例如,投資方面,買中左隻曾經賺到錢嘅股票,出出入入都未輸過,就好易會當左佢係朋友,當左佢做果個category嘅唯一正統,咁就大獲啦,因為,佢突然間嘅淪落,會同你攜手進退呀。如果佢係700,咁當然無問題啦;但如果係330、992、2038等等嘅前零售、IT同製造業大佬,死抱唔放,咁都幾大獲啊……

有人話,想狠心放下咁去斷捨離,一定要用「我」行先,必定要自私。只要一唔符合現在嘅我當刻嘅需要,無論果樣野係人、關係、事情、物件、心情,都必要機械化咁完全切割斬斷。首先,簡單啲開始,由自己常用嘅野開始,可先由幾方面入手,就係銀包、房間同電話簿。銀包入面多餘嘅信用卡、積分卡、相、消費單據、馬會彩票、戲飛等等,唔重要嘅全部都可以唔keep,只用money holder就可以嘞。 房間同電話簿都係一樣,唔用、唔著、唔搵嘅野同人,可以放棄,做人嘅負擔同顧慮都可以少啲。第二,關於理財嘅就係保險、投資組合同MPF。整合吓保險單,睇吓有無買多買少需唔需要cut單順便還吓人情單,符唔符合你宜家嘅實際健康同醫療需要。整合吓投資組合,賣Q曬果啲你唔熟又聽人講而買果啲基金同number,只留低最核心果3到5隻。而MPF都一樣,只揀留低一個保留帳戶,其他嘅都唔用,因為管一個account好過管幾個。最後,要斷捨離嘅係唔好嘅生活習慣同心態,不過,啲方面係長時間嘅戰爭,唔係話斷就斷。

面對物品就係面對自己,整理自己嘅野個果過程,就知道自己係點、想點;而整理掉野嘅過程中,又可以睇到自己做選擇、落決定嘅變化,價值觀唔同左?睇野成熟左全面左?一個人內心太多野,會慢會唔夠ram呀!斷捨離製造多啲空間,being spacious,人先有空閒去諗野策劃野,先有多餘時間思考人生。