打工仔除咗要滿足上司、老細嘅要求,其實同事都絕對唔可以忽略!

因為好同事會令你鍾意呢份工,但如果同事之間關係好差,就算係絕世筍工都會令你嗌晒救命!

除咗瞓覺,返工就佔人生最大部份嘅時間(可悲),所以無論如何,打工仔都一定要學識點樣融入同事嘅圈子啊~

1. 講飲講食

#隱世 #邪惡 #芝士 #拉絲等關鍵字雖然人人都鬧,但每次post咪又係照樣最多人睇,所以飲飲食食真係香港人最留意嘅嘢。順住呢條路,可以同同事分享邊度飲飲食食好,又中過咩伏,甚至係講吓公司附近嘅餐廳,乘勢邀請大家一齊食個lunch!

2. 關心同事

多啲觀察同事,記住佢哋嘅興趣、住嘅地方等等,到有機會時就傾幾句,就住唔同人嘅特點打開話題,等佢哋覺得你呢位同事都唔錯,幾關心人。

3. 留意facebook趣事

其實大家得閒都會碌吓facebook,睇到好多得意趣事,諗唔到有乜嘢講嘅時候不妨分享吓,輕鬆打開話題!

4. 講笑話

雖然笑話係引起共鳴嘅好方法,但前題係個笑話一定要有質素,唔好講完令人頭上烏鴉飛過,全場dead晒嗰啲……所以要事先好好準備,一係唔講,一係就講個一定好笑嘅!

(圖片來源:tumblr)