新著龍虎門外傳東方真龍初期真係有少少驚喜，當對一系列既外傳失望後，難得玉皇朝肯嘗試新既方向 ~ 從舊著埋手。


個人覺得舊著當年既爛尾可以歸咎好多原因；


其一，依賴慣性收視（和TBB一樣），變得故事畫功求求其其，群抽老祖宗十期八期，抖兩期又來十期，抖兩期再來十期，當讀者係咩？


其二，故事失控，當人可以變神，可以元神復活，金鐘罩有十四關，盤古天殛震由三十三層天去到九十九層天，仲有咩係唔得？


其三，作者不斷更換，可能係辦公室政治既關係，導致龍虎門後期不斷更換主筆，每個主筆都有自己既一套，令我地支持咗千幾期既讀者，完全感覺到那種肢離破碎；


其四，龍虎門去到後期，原本感到有種撥亂反正既感覺，作者造瓜神人老祖宗，出現過既教派由新一代教主統領，武功故事逐漸回歸正常之際，玉皇朝購入龍虎門版權，一切重新來過...！


其實千多期的龍虎門，當中真係好多Bugs，好多犯駁，其中失踪人口馬小靈就經典到夏金城就出碟唱佢；廣法堂獅組組長獨角狻猊先俾炮彈炸到粉身碎骨，後突然反生再死咗多次；吸星決，御劍飛行練到通街都識，個個都話練來飛昇...；天下第一，第二，第三...，出極唔完；六月初四一個堂口都勁到無倫，而佢只係教派既三百六十五份一勢力，利害...利害...！主宰會七洲巨龍又係個個超人，但主人天帝原來只係蜀山大魔神手中既傀儡，小丑一名......！


一個咁千蒼百孔既故事真係好惡攪，基本上推倒重來一定易過慢慢撥亂反正，但千多期既情感又好難放得低，要怪就怪當日結局來得太突然，太求其。


舊著龍虎門完結於那團搵笨的白茫，東方真龍外傳就由那段白茫中重新開始。原本各大神級高手，因終極大戰各自重傷武功降Level，打鬥回歸到較易接受既程度；馬小靈既重現，令舊讀者重拾舊歡；眼看舊著補完計劃踏出成功既一步之際...，馬小玲死了...！絕世高手弱到街邊黑社會都幾乎攪掂了！！天下無敵個仔又出現了...！！！故事...又亂來了！！！！