香港人出名工作壓力大，加班喺老細眼中係應份，所以好容易就被工作淹沒，有抖唔到氣、迷失方向嘅感覺。
雖然我哋未必可以改變大環境，但至少可以令自己變得更強頑，唔俾壓力打低！想增加自己嘅抗壓能力原來可以從食物入手，英國最佳營養學會（Institute Of Optimum Nutrition）嘅專家就選出10種食物，話可以提升大家嘅開心指數！
生果類
1.士多啤梨
士多啤梨含有豐富嘅維他命C，有助製造安多酚。而紅色嘅果皮更含有花青素，有助改善心情。而安多酚係一種天然物質，有止痛作用，更會令人產生興奮嘅感覺。
2. 橙
橙同士多啤梨一樣有維他命C，而且有維他命B、黃酮類化合物以及可以抗氧化嘅成分。
3. 香蕉
香蕉含鉀，有助身體神經系統嘅運作，而且當中嘅澱粉質亦有助心情保持愉快。
4. 提子
提子同樣有豐富維他命C，仲有高抗氧化嘅多酚，可以預防心臟病及癌症。
甜食類
5. 黑朱古力
朱古力嘅原材料可可豆含有N醯基膽胺，可刺激大腦分泌安多酚。
6. 雪榚
雪榚由牛奶製成，含有維他命B12、核黃素、鈣、蛋白質同維他命A，具抗氧化功能，有助抗壓。想健康啲話，可以選擇高鈣低脂乳酪嚟代替。
主食類
7. 意粉
意粉含有碳水化合物同蛋白質，既可以為身體提供能量，當中嘅氨基酸，更有助製造安多酚。
8. 全麥麵包
全麥麵包含有硒，可以提振心情。
果仁類
9. 堅果
富含維他命B、蛋白質及硒，但就要小心唔好攝取太多，一日以400微克為限。
10. 芝麻
芝麻中嘅維生素B6，有助消除疲勞，提升抗壓能力；而色胺酸就可以鎮靜情緒。
（圖片來源：tumblr）
