現實中總有啲人喺感情上會出軌，有科學家指偷食嘅人喺基因上一早就已經注定咗，亦有人為著唔同嘅原因背叛自己嘅伴侶。到底你係咪其中一位呢？或者你呢刻會心諗「點會呢，我一定唔會咁做」，但到底係真唔係？好多時，人都係習慣自欺欺人嘅，可能當你未意識到嘅時候，你已經跌入出軌嘅陷阱喇。
跟住落嚟講嘅4點就係大家好容易忽略，但又係偷食高危一族嘅特徵！無論係身為男朋友定係女朋友都好，睇完下文了解對方嘅潛藏性格之餘，同時都要反省自己啊！
1. 成日抱怨
呢種人成日都會覺得啲嘢唔夠好，無論係身處咩環境定係見到咩嘢都可以挑剔出唔同嘅缺點。如果一個人對其他嘢係永遠都唔會覺得滿足嘅話，同樣地拍拖嘅時候都會覺得身邊嘅伴侶未夠好，繼而揾過第2個嚟補償。
而最難頂嘅人往往就係周圍同其他人力數另一半有咩唔好，因為咁樣反映佢完全唔尊重對方，更加唔好講會因為愛對方而唔出軌。
2. 總係選擇冒險
有種人總係覺得人生要好似戲劇一樣大上大落、充滿挑戰先至過癮。為咗令自己嘅生活保持新鮮感，佢哋總係願意冒險做唔同嘅事。你以為佢哋只係玩樂上追尋刺激？恐怕咁嘅性格對愛情嘅要求都一樣係不新鮮刺激不滿足，包括係背住伴侶偷情，或者係經歷住幾乎俾人揭破嘅快感。
心理專家指呢種人寧願追求情感上嘅過山車，都唔希望找尋舒服、穩定嘅滿足感。而呢種人不單止鍾意冒險，仲係機會主義者，將可以玩弄關係嘅機會計到盡，喺出軌嘅界線間游移。
3. 習慣將事情收收埋埋
其中一樣令伴侶覺得雙方嘅關係出現問題、引發出軌嘅事就係我哋唔識點樣同對方表達自己嘅需要，所以為咗擺脫寂寞嘅感覺，或者唔知點樣處理時，就好容易陷入出軌嘅危機。根據2004年嘅一項研究發現，男人普遍嚟講偷食嘅原因係追求肉體嘅新刺激，而女人出軌就好多時係因為想有被需要嘅感覺。
其實只要我哋坦誠地同對方講自己嘅需要，就唔會去到要背叛伴侶先滿足到自己。
4. 講「善意嘅謊言」
你有無試過同伴侶講過所謂嘅小謊言呢？其實有第一次，就自然好習慣有第二、第三次。即使同對方講「唔為意」講咗大話過到骨都好，到頭來問問自己其實係咪有心講大話呢？如果話講第一個大話係想保護對方嘅感受，咁第二個就係為咗令自己免去被伴侶質疑嘅麻煩。
但無論你講嘅係咩大話，抑或你有咩動機都好。研究指出會講「善意謊言」嘅人喺大事上都傾向瞞騙自己嘅另一半。所以下次當你想「保護對方嘅感受」，或者係想「避免爭吵」時，最好嘅做法都係坦白啦。
當身處出軌邊緣嘅時候，與其不斷埋怨，不如坦白同對方講出自己嘅需要，好好解決問題，唔好抱住冒險嘅心態，咁先可以拯救一段寶貴嘅關係，唔好俾自己悔恨一世！
（圖片來源：tumblr）
