自從出現咗智能電話之後，大家都相當沉醉於喺各大social apps上分享自己嘅近況。無論係情侶曬恩愛、浪子周遊世界、吃貨食好西，定係感懷身世post都好，每日一po是常識吧？
但當真金白銀畀幾千至過萬蚊去一趟旅行嘅時候，你哋會唔會都仲係不出post打卡不罷休呢？以下就係近年嘅10大旅客怪病，睇吓自己有無中槍啦！到底旅行嘅意義係同全世界宣佈，定係好好感受一個地方呢？小編就答你唔到喇，因為人人需要嘅嘢都唔同，自己好好諗吓啦。
1. 無論行到去邊都碌住部手機
仲係學生嘅話就有多啲假去旅行，但如果係打工仔，一年可能大約得10日年假左右，其餘355日已經每日碌住部機唔肯放，連剩返嗰10日都要碌埋佢，當見到啲人無論搭火車、行路、食飯都碌手機時，真係忍唔住想話，放過部機啦好嘛？
2. 置身美景但就係咁影相
其實你對眼就係最好嘅相機，去到一個好靚嘅地方，想紀錄低都好正常嘅，但就要注意唔好剩係執著於影一張靚相，用你對眼好好感受同記住眼前嘅美景，先係最重要㗎！
3. 慌死人哋唔知你去咗旅行之ig大洗板
ig唔同facebook，唔可以一次過post一個相集，咁想將去過嘅每一個地方、食過嘅每一樣好嘢都想喺ig分享畀大家睇嘅人，可能就會選擇一次過post十九幾張相，實行嚟個大洗板！其實……用觀眾嘅角度睇會覺得你好煩……
4. 自拍相出現率大大高於風景相
明明係搭飛機去左幾千幾萬公里外嘅地方，但影嘅相照舊係大頭自拍，依然係表情、人物大集合，咁講嘅話其實嗰10%露出嘅背景一啲都唔重要吖，點解仲要嘥錢搭飛機喎，去租個自拍場景studio咪得囉，你哋話係咪先？
5. 為咗張靚相唔要命
間唔中就會見到啲企喺懸崖邊，仲要做晒唔同動作嘅相出現喺社交網站，見到都忍唔住替佢抹一額汗。青春留倩影係緊要嘅，但都要注意安全啊！（咪一個唔小心，嗰張相就變咗……唉呀～）
6. 每日旅行都係一場fashion show
對同葉劉一樣「喜歡玩時裝」嘅人嚟講，每日影一張#ootd實在係必不可少，但如果嗰日要攀山涉水或者趕行程嘅話，建議都係輕裝上陣比較好。
7. 眼闊肚窄大嘥鬼
（Music唔該）「食唔曬 唔好亂咁買啦 食剩咁多 真係嘥」
小編最鍾意嘅政府吉祥物大嘥鬼（留意返可以follow佢個搞鬼fb專頁）要出場譴責呢班人喇！點餸嘅時候見到menu上每一樣都咁吸引，唔知食咩好，所以叫一大堆返嚟？所謂惜食愛地球，仲可以錫住你個荷包，何樂而不為呢？
8. 手機/相機食先
行街買嘢定係趕完幾個鐘行程之後，揾到間啱食嘅餐廳、點菜，再等到嘢食嚟，個肚已經餓到咕咕聲。如果仲要等埋你係咁影相、打卡先有得食，咁對你哋嘅旅伴嚟講真係一大折磨，更重要嘅係，再正嘅美食一凍咗都無咁好食啦！
9. 排長龍都要去「必食」、「必飲」食店
鍾意睇閃令令旅遊書「必食」、「必玩」推介嘅人，會唔會一定要跟住裡面嘅指引朝聖先甘心，覺得咁先係去咗一個地方旅遊呢？其實旅行無一定嘅公式，有時候無心插柳仲可能令你食到一世難忘嘅隱世美食！
10. 跟住「必買」清單掃貨
最後呢點好似近幾年都同台灣、日本離不開關係，跟住所謂嘅必買清貨盲掃一大堆貨時，有無認真諗過自己需要啲咩？奉勸睇必買推介嘅人都要睇得精明，好好研究邊啲產品適合自己，如果唔係到最後可能又囤塞晒啲貨喺屋企，過期都未用得完㗎喇。
（圖片來源：tumblr）
