【大掃除必學】灶台清洗技巧話你知

（文：呀J）

要問媽咪屋企邊個地方最難清潔嘅肯定係非廚房莫屬，每次煮食嘅油煙充滿廚房每個角落，而油煙停留係上面難以清潔乾淨，舊油加新煙，如此類推就成為咗頑固污漬，非常棘手。灶台離煮食地方最為接近，成為廚房最容易污糟嘅位置，以下裝修佬同大家分享廚房灶台嘅清潔技巧，一齊分享俾你身邊嘅朋友啦！

灶台瓷磚防污法 

中式煎炸爆炒嘅煮法，令廚房每個角落都充滿油煙，瓷磚之間嘅空隙最容易積聚油污，每次清理都非常麻煩。可以用蠟燭塗抹每一條瓷磚空隙，先順住空隙方向塗，塗滿以後再橫過來塗一次，務必將蠟燭嘅厚度同瓷磚嘅厚度一樣。蠟燭表面光滑，即使有油污黐係上面，只需用濕布抹一次便可。 

灶台深度清潔 

將兩羹白醋同200ml暖水混合，然後用百潔布沾熱醋水清洗便可。或可用500ml熱水同30g梳打粉混合，一樣用百潔布清洗，就可以輕鬆去除灶台油污。 

如果灶台油垢比較頑固，可以直接將梳打粉或粗鹽撒係灶台上，然後用布抹，就可以輕鬆去除灶台嘅油污搓走，再清潔乾淨便可。或將百潔布擺係啤酒浸一陣，然後抹有頑固污漬嘅灶台便可。 

水煮火架 

火架平時被湯汁或油脂整污糟後，就算用清潔劑清洗，都難以清潔乾淨，將火架放係水煮滾，你會發現油膩膩嘅污垢自會分解剝落。 

同灶台敷面膜 

如果灶台頑垢難除，呢個時候唔可以用鋼絲刷來對付，鋼絲刷可能會損壞灶台表面，出現縱橫不一嘅劃痕，你可以試下同灶台敷面膜，先將廚房紙加清潔劑浸濕，鋪係灶臺上放置約15分鐘後擰走，油漬已經被紙巾帶走，油污越犀利，敷嘅時間越長。 如果灶台唔係太污糟，可以用啤酒、洗米水、麵湯來敷面膜，洗米水同麵湯含有大量澱粉，同灶台油污接觸後，去除油漬能力強，而啤酒泡沫中嘅小麥花亦係油污剋星。

(以上圖片均來自網路，如有任何版權問題，請與本站聯絡)